Tres actrices da serie 'Rapa' dan arranque ás festas de verán de Ferrol
Tamén actuará na praza de Armas a formación Efecto Mariposa, o día 20, o de comezo das festas.
Por Europa Press / Redacción | FERROL | 10/08/2023 | Actualizada ás 17:02
O alcalde de Ferrol, José Manuel Rey Varela (PP), anunciou que o pregón das festas de verán será pronunciado a cargo de tres das actrices da serie 'Rapa', concretamente Mónica López, Paula Morado e Iolanda Muíños, que o farán desde o escenario da praza de Armas desde as 21.30 horas.
"Rapa é unha das mellores embaixadoras de Ferrol, dando a coñecer a nosa cidade, a nosa riqueza e idiosincrasia. Emociona ver Ferrol como protagonista estático dunha serie. Será un magnífico pregón á altura dunha gran cidade" detallou o rexedor, que presentou o programa en compañía do seu edil de Festas, Arán López, e precisou que se destinarán ata 420.000 euros durante os once días de actividade "para todos os públicos e para todas as idades".
"Os ferroláns merecen unhas festas á altura da cidade que somos e fixemos un gran esforzo para poder traer esta programación aquí", apuntou Rey Varela, que lembrou que na cidade estarán Marlon (25 agosto), La La Love You (26 agosto), Treixadura (27 agosto), Camela (29 agosto), Fillas de Cassandra (30 agosto) e a orquestra Olympus (31 agosto en Ferrol Vello), ao que se engadiu un concerto de Efecto Mariposa, para o día 20, unha proposta de Cadena 100.
PARA TODAS AS IDADES
Todo iso complementado con propostas para o público infantil, sendo outra das novidades o regreso das atraccións de feira desde a praza de España á zona da alameda do Cantón de Molins. Rey Varela detallou que tamén se instalarán puntos violetas, "porque queremos unhas festas seguras" e agradeceu o intenso traballo realizado polo concelleiro de Festas para poder presentar esta variada programación. O 28 de agosto chegará a quenda para a música tradicional das rondallas na praza de Armas, cun festival a partir das 22.00 horas, pechando a celebración o 31 de agosto, cos tradicionais lumes de San Ramón e a actuación da orquestra Olympus na zona do porto.
