A nova senda na avenida das Caldas, que conectará Ourense de norte a sur, comezará a finais do verán para rematar a finais de 2024

A Xunta formalizou o contrato para executar as obras da senda que irá desde a intermodal ata a Ponte Romana, pola avenida das Caldas, no concello de Ourense. Nun comunicado, o Executivo galego detallou que suporá un investimento total de 1,2 millóns de euros. A empresa adxudicataria é Proyecon Galicia, S.A.

Así, o contrato é parte das actuacións para a conformación dunha senda que conectará Ourense de norte a sur mediante 5,1 quilómetros de itinerarios cun investimento global de oito millóns de euros. Desta forma, a actuación sumouse á adxudicada no mes de xullo por máis de 3,5 millóns de euros para executar a senda entre Os Remedios e Expourense, ao longo do paseo do Barbaña.

A previsión da Xunta é de comezar as obras de acondicionamento da avenida das Caldas a finais do verán e iniciar no último trimestre as obras da senda do Barbaña, co obxectivo de poder ter acabados os traballos a finais de 2024. As obras da senda entre a intermodal e a Ponte Romana suporán a humanización integral da avenida das Caldas, para convertela en "porta de entrada á cidade". Así, detallou que mellorará a mobilidade peonil e ciclista nun treito que coincide coa Vía da Prata.

Así mesmo, explicou que intervirán ao longo de 600 metros coa habilitación de beirarrúas máis anchas e carril bici, gañando espazo para as persoas e reducindo a circulación do tráfico rodado a un carril, sentido baixada, e pola marxe dereita farán un aparcadoiro, paradas de autobús e zonas de carga. Estas actuacións enmárcanse nos proxectos impulsados pola Xunta no marco dos fondos Next Generation co obxectivo de fomentar a mobilidade sustentable das cidades galegas.

Así quedará a Avenida das Caldas | Fonte: Proxecto - Arquivo