Luís Menor nomea a Marta Nóvoa, alcaldesa de San Cibrao, vicepresidenta da Deputación de Ourense

O presidente da Deputación de Ourense, Luís Menor, asinou este luns os decretos de nomeamento do novo goberno provincial, que contará coa alcaldesa de San Cibrao, Marta Nóvoa, como vicepresidenta primeira, e que terá outras dúas vicepresidencias, oito áreas de goberno e catro delegacións especiais. Segundo explicou a institución provincial nun comunicado, a reorganización das responsabilidades baseouse nos perfís de cada un dos membros do equipo de Menor.

Deputación de Ourense | Fonte: DEPUTACIÓN DE OURENSE

Deste xeito, a repartición establecida para os membros da Xunta de Goberno foi: Presidencia e Cooperación para Luís Menor; a vicepresidencia primeira, Facenda, Economía e Recursos Humanos para Marta Nóvoa; a vicepresidencia segunda para o rexedor municipal de Ribadavia, César Fernández, quen ademais se fará cargo de Cultura, Educación e Deporte; e a vicepresidencia terceira para Plácido Álvarez, alcalde de Muiños, que ocupaba o cargo de portavoz e agora pasará a ser vicepresidente terceiro levando Administración Provincial, Transparencia, Emerxencias e Cooperación Transfronteiriza.

Pola súa banda, Rosendo Fernández, quen ocupaba o cargo de vicepresidente primeiro no mandato de Manuel Baltar, foi relevado por Marta Nóvoa, pero seguirá á fronte do Inorde e ademais estará á fronte de Turismo, Termalismo e Representación Institucional. Política Social, Conciliación, Envellecemento activo e a portavocía son para a alcaldesa de Boborás, Patricia Torres. Así mesmo, Medio Ambiente e Enerxía para José María Lago, concelleiro na Gudiña, e Innovación, Obxectivos de Desenvolvemento Sustentable e Axenda 2030 para o edil do Concello de Ourense, Jorge Pumar.

DELEGACIÓNS ESPECIAIS

Ademais, haberá catro delegacións especiais: Igualdade e Mocidade, para Teresa Barge, alcaldesa da Bola; Infraestruturas, para Manuel Seoane, alcalde da Peroxa; Novas Tecnoloxías, Reto Demográfico e Dinamización do Medio Rural, para Xosé Miguel Blecua, rexedor de San Xoan de Río; e "delegación especial para Valdeorras", para a alcaldesa de Carballeda de Valdeorras, María del Carmen González.

"RENOVACION" E "EXPERIENCIA"

O presidente provincial, Luís Menor, destacou que o seu novo equipo de goberno "mestura a renovación", tanto de áreas como de deputados delegados, "coa experiencia de persoas cunha importante traxectoria na administración provincial" e enxalzou como unha das principais características que "a práctica totalidade dos membros son alcaldes e alcaldesas".