Por Europa Press / Redacción | SANTIAGO DE COMPOSTELA | 22/07/2023 | Actualizada ás 20:01
Os líderes das principais forzas políticas galegas acudirán a exercer o seu dereito a voto nestas eleccións xerais entre as 10.30 horas e as 12.00 horas deste domingo nos seus respectivos colexios electorais.
Así, a máis madrugadora será a portavoz nacional do BNG, Ana Pontón, que ten previsto acudir a votar ás 10.30 horas no Centro Galego de Arte Contemporánea (CGAC), en Santiago de Compostela. Antes, ás 09.45 horas, acompañará ao candidato do Bloque pola provincia da Coruña, Néstor Rego, a votar ao Centro Cívico de Figueiras, tamén na capital galega.
Xa pola tarde, Pontón seguirá o final da xornada electoral e o reconto cos seus na Nave de Vidán. Os nacionalistas farán unha primeira valoración da xornada unha vez pechen os colexios electorais.
Á mesma hora que Pontón acudirá ás urnas o presidente da Xunta e dos populares galegos, Alfonso Rueda, que irá ás 10.30 ao Centro Galego de Tecnificación Deportiva de Pontevedra a depositar a súa papeleta.
O líder do PPdeG realizará o seguimento da xornada electoral e dos resultados na sede dos populares galegos en Santiago, onde se prevén comparecencias.
Pola súa banda, o secretario xeral do PSdeG, Valentín González Formoso, exercerá o seu dereito a voto no CEIP A Magdalena do municipio coruñés das Pontes, onde é alcalde, ás 12.00 horas.
Ademais, a cabeza de lista de Sumar Galicia pola provincia de Pontevedra, Verónica Martínez Barbero, ten previsto votar ás 11.00 horas na Escola de Educación Infantil O Areal, en Baiona. Mentres, a cabeza de lista ao Congreso de Vox pola provincia da Coruña, Juan Garcilaso de la Vega, acudirá a votar ás 09.45 horas ao Centro cultural de Montrove, en Oleiros.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.