O PSdeG cre que a Lei de Igualdade da Xunta está "pensada desde a dereita" e "non acompaña os avances do feminismo"
Os socialistas galegos reivindican un novo marco lexislativo que aposte pola igualdade.
Por E.P. | SANTIAGO DE COMPOSTELA | 07/07/2023 | Actualizada ás 15:59
A portavoz de Igualdade do Grupo Socialista, Noa Díaz, asegurou que a Lei de Igualdade da Xunta está "pensada desde a dereita" e "non acompaña os últimos avances do feminismo". A deputada socialista, que lamentou a falta de ambición de lei que afronta o seu trámite parlamentario, presentou este venres as 234 emendas dos socialistas a un texto "manifestamente insuficiente" e que "parece pensado para non molestar á extrema dereita" aliada do PP "á conta de frear o avance social e político e de recortar os dereitos das mulleres".
Noa Díaz criticou que esta norma "conxela a loita do feminismo pola igualdade real e efectiva de mulleres e homes" e demóstrase "manifestamente insuficiente" por "carecer" de avances significativos e perspectiva de futuro. A parlamentaria socialista considerou que o PP e a Xunta demostran unha "alarmante falta de implicación real e de concreción de medidas" e limitan a norma a unha "declaración de intencións sen efectividade legal".
Fronte a iso, reivindicou un novo marco lexislativo que aposte pola igualdade, que actualice e que avance na procura de máis dereitos, fronte a un PP que "abraza as teses do que foi presidente de Galicia e que agora parece que deixou a moderación gardada nun caixón". Tras lamentar lamentou que o negacionismo da violencia machista "non está a ser en realidade a liña vermella que a dereita di ter" e sostivo que se trata dunha lei que máis aló do ámbito laboral "non desenvolve novas obrigacións e dereitos para a consecución da igualdade" en materias como a educación, a saúde ou a representación equilibrada.
Ademais, dixo, impón novas obrigacións e deberes á administración local, dándolle novas responsabilidades aos Centros de Información á Muller, pero "non compromete en ningures maiores recursos por parte da Xunta de Galicia". A responsable socialista reclamou obrigacións en materia educativa dirixidas aos centros concentrados, así como a inclusión da educación afectivo-sexual na educación, que supón "o primeiro paso para romper co incremento das violencias sexuais". Tamén lamentou a "escasa iniciativa do Goberno galego neste sentido para caer nas mans do sector máis conservador", e propuxo que "non teman e aváncese na materia".
