A Deputación de Lugo pon a disposición dos concellos unha ferramenta gratuíta de loita contra a corrupción
Este sistema interno de información servirá para que os cidadáns "poidan informar sobre infraccións penais ou administrativas".
Por E.P. | LUGO | 26/06/2023 | Actualizada ás 18:50
A Deputación de Lugo impartiu unha xornada informativa para as entidades locais da provincia sobre a Canle de Denuncias, un servizo informatizado sobre infraccións normativas e loita contra a corrupción que esixe a Unión Europea.
Segundo indica o organismo provincial, o deputado en funcións de Promoción Económica e Social, Pablo Rivera Capón, explicou este luns a "unha decena de técnicos de diferentes concellos" o manexo desta ferramenta gratuíta co fin de "avanzar en trasparencia e bo goberno". A Deputación de Lugo, engade, implantou este sistema interno de información que servirá para que os cidadáns "poidan informar sobre infraccións penais ou administrativas".
Na páxina web da institución, ademais, hai acceso a información relevante sobre a Canle de Denuncias, o responsable do sistema, os dereitos do informante e a política de protección de datos. Do mesmo xeito, pódese consultar o procedemento establecido para a xestión das comunicacións recibidas, indica o organismo.
