Atrasos nos exames das oposicións ao Sergas polas retencións de tráfico na AP-53

O conselleiro de Sanidade, Xullo García Comesaña, visitou este domingo o Recinto Feira Internacional de Galicia, onde se celebraron os exames de oposición de Enfermaría, nos que participaron 8.700 opositores dos 10.101 convocados (86,1% de participación). A administración sanitaria oferta para a categoría de enfermeiro un total de 1.556 prazas (1.135 para a quenda de acceso libre, 332 para promoción interna e 89 a discapacidade xeral).

Segundo informou o departamento autonómico nun comunicado, o 67% das persoas admitidas na categoría de Enfermaría teñen actualmente vínculo activo co Servizo Galego de Saúde e, máis de 1.100 aspirantes proceden de fóra da Comunidade. Apuntan tamén que o 87% dos opositores son mulleres, e que o 16% terá que realizar o exercicio de galego ao non estar en posesión do Celga IV. No que se refire a as probas de acceso a inspector de farmacia, dos 149 aspirantes admitidos, presentáronse ao exame 113 persoas (75'8% de participación).

ATRASOS NO COMEZO DA PROBA

Os exames das oposicións á categoría de Enfermaría do Servizo Galego de Saúde (Sergas), previstas para as 10,00 deste domingo no recinto feiral de Silleda (Pontevedra), atrasáronse debido ás retencións de tráfico na AP-53. As retencións comezaron á primeira hora da mañá, superando o tres quilómetros e con algo máis dunha hora de espera.

Debido a isto, o Sergas enviou unha mensaxe tranquilizando aos examinados e informando de que as portas de acceso ás probas non se pecharían ata que finalizasen as retencións. Ás 11,00 horas, aínda había participantes accedendo ao recinto.

A este proceso selectivo concorren ao redor de 10.000 aspirantes para 1.556 prazas, das que a gran maioría (1.135) son de acceso libre.Haberá outras 332 vacantes por promoción interna e 89 reservadas para persoas con discapacidade. Monbus habilitou un total de nove servizos especiais de autocares que sairán desde distintos puntos da Comunidade.