Tellado insinúa un pacto tras a saída de Baltar para que o PP continúe gobernando a Deputación de Ourense
"Decidiu apartarse desa ambición que podería ser lexítima, ser presidente da Deputación, para non ser un obstáculo á hora de que calquera partido poida facilitar o noso goberno", di.
Por Europa Press / Redacción | MADRID | 15/06/2023 | Actualizada ás 12:07
O vicesecretario de Organización do PP, Miguel Tellado, agradeceu este xoves a "responsabilidade" do presidente do PP de Ourense, Manuel Baltar, ao renunciar a presidir de novo a Deputación provincial, despois da polémica, pendente de xuízo, por ser cazado a 215 quilómetros por hora ao volante dun coche oficial.
Tellado, que foi secretario xeral do PP galego entre 2016 e 2022, recoñeceu que Baltar ten un xuízo pendente e valorou que apartarse nestas circunstancias é un "exercicio de responsabilidade que o partido ten que agradecer".
Nunha entrevista con RNE, recollida por Europa Press, o cabeza de lista pola Coruña para as xerais asegurou que a decisión de Baltar o que pretende é "non ser un obstáculo" para que o PP manteña a Deputación ourensá.
"É UN EXERCICIO DE RESPONSABILIDADE"
Tellado fixo fincapé en que o PP gañou as eleccións pero non ten a maioría absoluta, así que depende doutros partidos. Baltar "decidiu apartarse desa ambición que podería ser lexítima, ser presidente da Deputación, para non ser un obstáculo á hora de que calquera partido poida facilitar o noso goberno. Eu creo que é un exercicio de responsabilidade", insistiu.
A renuncia de Baltar pon fin a un ciclo político no que este apelido estivo ligado á institución provincial galega: nos últimos 11 anos, da man do ata agora presidente, e durante máis de dúas décadas previas co seu pai, José Luís Baltar Pumar.
