Dúas esculturas que están nun museo de Barcelona puideron ser substraídas ilegalmente do mosterio de Carboeiro

O Parlamento demandou á Xunta que analice o caso da desaparición de dúas esculturas do mosteiro de San Lorenzo de Carboeiro co obxectivo de restituír estas pezas, que se atopan nun museo público de Barcelona, ao patrimonio cultura de Galicia.

A proposición non de lei foi presentada polo grupo popular na Comisión 4ª Educación e Cultura este venres e foi defendida polo deputado José Luís Ferro, que explicou que unha recente investigación do historiador Francisco Pardo Villar apunta a un posible espolio de varias pezas integrantes do ben que actualmente atópanse no Museo Frederic Marès de Barcelona. Trataríase dun Cristo en Maxestade e dunha talla con símbolos dos evanxelistas San Lucas e San Juan.

Así, segundo detallou, a aparición de diversas cartas no Arquivo de Galicia e o Arquivo Xeral da Administración poderían probar a subtracción ilegal destas dúas esculturas da igrexa. "A partir do coñecemento destas cartas, a Consellería de Cultura púxose en contacto tanto co Museo Frederic Marès como co Concello de Barcelona para trasladar os feitos e solicitar información sobre como chegaron as pezas ata as instalacións deste centro cultural catalán", explicou.

Sobre isto, Ferro manifestou que "todas as partes mostraron boa dispoñibilidade para devolver as pezas se, como todo parece, a saída destas obras de arte non fose legal", pero, engadiu que "a día de hoxe" esperan pola documentación que "desde o museo e desde o Concello comprometéronse a trasladar canto antes".

Ademais, Ferro lembrou que este mosteiro, situado no municipio pontevedrés de Silleda, xa sufrira "moitas vicisitudes ao longo do seu once séculos de existencia", pero sinalou que foi a partir do ano 1835, coa desamortización de Mendizábal, cando "comezou o abandono e espolio deste cenobio".

APOIOS

Por parte do PSdeG, a deputada Noa Díaz mostrouse "sorprendida" porque os populares levasen esta proposta "de urxencia" o pasado 18 de xaneiro, cando xa se produciron os contactos entre a Xunta, o museo catalán e o propio Concello de Barcelona, que "xa dixo que a súa política é que calquera peza que se demostre que chegou ao museo de forma irregular devolverase de forma inmediata".

Nesta mesma liña, Díaz pediu aos populares que "non empreguen electoralmente esta iniciativa para arrogarse como os grandes salvadores do patrimonio de Carboeiro", entre outras cousas, apuntou, porque non ve "a mesma preocupación nin a mesma celeridade con outros bens froitos do espolio franquista".

Por iso, presentou unha emenda que vai "un paso máis aló" para que se reclame a "restitución para o patrimonio galego destas dúas esculturas" porque "xa está máis que analizado". Doutra banda, a deputada do BNG Mercedes Queixas, que xa avanzaba no inicio da súa intervención que votarían a favor, agradeceu ao investigador Prado Villar que conseguise "sacar á luz esta documentación" que, celebrou, "por fin proba o que xa se sabía".

Con todo, pediu aos populares que non permitan que a Xunta "deixe caer o expediente BIC para a Casa Cornide". "Agradézolles que se somen á defensa do patrimonio en xeral", salientou Queixas.

Sede do Parlamento de Galicia na rúa do Hórreo de Santiago