O BNG insta á Xunta e ao Goberno central a usar os fondos de continxencia para reparar os danos causados polas riadas
Esixiron a colaboración cos concellos.
Por Europa Press / Redacción | PONTEVEDRA | 04/01/2023 | Actualizada ás 14:13
O BNG esixiu á Xunta e ao Goberno central que colaboren cos concellos para reparar os danos provocados polas recentes riadas. Solicitaron ademais ao Executivo autonómico que utilice os fondos de continxencia dos Orzamentos do 2023 para reparar os danos.
O portavoz de Infraestruturas, Luís Bará, desprazouse ás localidades pontevedresas de Mondariz Balneario e Salvaterra, Ponteareas e Mondariz, concellos da comarca do Condado e do Baixo Miño, "zona 0 das inundacións".
O nacionalista demandou á Xunta que "compareza, porque está desaparecida nesta catástrofe", ademais de levar a cabo unha labor de coordinación co resto de administracións e que "se poña en contacto cos concellos afectados, as deputacións e o Goberno central".
Neste senso, emprazou á Xunta a utilizar os fondos de continxencia dos Orzamentos para reparar os danos nos bens municipais e privados danados polas riadas, entre os que se atopan "xoias de gran valor patrimonial como a Fonte de Troncoso, en Mondariz Balneario, e estradas, pontes, camiños e infraestruturas deportivas e infantís".
"A Xunta non pode estar ausente nestas circunstancias", concluíu Bará, que avanzou que o BNG presentará no Parlamento unha serie de iniciativas encamiñadas á reparación dos danos.
