Manifestación a prol do Donbass e Rusia e dunha "Ucraína antifascista" en Santiago

O Comité Galego de Apoio ao Donbass (CGAD) tomou a decisión de chamar ao conxunto da militancia e destacamentos revolucionarios de Galicia a se manifestar en apoio das Repúblicas Populares de Donestk e Lugansk e do movemento antifascista en Ucraína. 

Unha rúa con sacos de area para conter os ataques rusos en Leópolis (Lviv), a 4 de marzo de 2022, en Lviv (Ucraína). Pau Venteo - Europa Press

Desde o golpe de Estado do Euromaidan en 2014, promovido e financiado a finais de 2013 pola UE e os Estados Unidos, Ucraína transformouse nun "inmenso campo de experimentación política e de formación militar nazi". Segundo explica o Comité, o Partido Comunista e as organizacións obreiras foron ilegalizadas, tamén os partidos non sometidos ao imperialismo. Nas últimas semanas, os "escasos dereitos preservados por outras organizacións non aliñadas coa política do réxime de Kiev foron tamén conculcados".

"O idioma ruso foi prohibido nos medios de comunicación e no sistema educativo. A rusofobia transformouse nunha política de Estado e traduciuse no exterminio das minorías étnicas e nacionais por parte do supremacismo racial inspirado en Stepan Bandera, líder histórico do fascismo ucraíno", prosegue o comunicado. Pese ao carácter "abertamente reaccionario" do réxime ucraíno, o CGAD constatou como a meirande parte das forzas políticas galegas optou por asumir un "discurso aliñado cos intereses do imperialismo, a Unión Europea e a OTAN".

Así, indican, en nome da paz promóvese a causa do Batallón Azov, rexéitase a desnazificación de Ucraína e négase o dereito á autodeterminación das Repúblicas Populares de Donestk e Lugansk así como o dereito á lexítima defensa por parte da Federación Rusa.

O CGAD entende que a Galicia "obreira, republicana e antifascista sabe ben de que lado da trincheira está: con quen combate con firmeza e determinación á besta nazifascista". "Os casos de Iugoslavia, Iraq, Afganistán, Iemen, Libia e Siria, constatan que a resistencia é imprescindible para non perecer perante á ameaza totalitaria global que pretenden impor Washington e Bruxelas", denuncian. 

É por iso que o CGAD quere facer un chamado a toda a militancia e aos destacamentos demócratas e revolucionarios con presenza en Galicia a se manifestar o vindeiro xoves 31. "Cómpre deixarlle claro ás forzas do Réxime que as e os obreiros galegos non faremos causa con elas. Cómpre comezar a construír solidariedade internacionalista cos pobos do Donbass, ucraíno e ruso para confrontar a barbarie aos que busca sometelos o gran capital norteamericano", conclúen.