O BNG non garante o "si" e presenta preto de 280 emendas por valor de 1.500 millóns aos PGE

O BNG presentou no Congreso un total de 278 emendas por valor de 1.500 millóns de euros para tratar de modificar os Orzamentos Xerais do Estado (PGE) para o ano 2022. As partidas van encamiñadas a corrixir "déficits" históricos como o da dependencia, a carencia dunha liña ferroviaria de proximidade e unha transición enerxética xusta, entre outras cuestións, e inclúe, por exemplo, unha partida de 200 millóns para intervir Alcoa e garantir así os postos de traballo antes de estudar unha eventual venda a un operador solvente.

A filosofía e emendas foron explicadas en rolda de prensa pola portavoz nacional do BNG, Ana Pontón, e o deputado no Congreso, Néstor Rego, quen explicaron que, polo momento, os nacionalistas galegos non están no "si", pero a postura final, advertiron, dependerá das negociacións e se se conseguen introducir cambios significativos.

"É un paquete de emendas para mellorar os investimentos para o país cunha única liña do BNG: a defensa dos intereses de Galicia", subliñou Ana Pontón, quen asegurou que o Bloque "acertou" o ano pasado "cando puxo por diante a defensa dos galegos" e non apoiou os orzamentos.

A xuízo dos nacionalistas, esa posición "firme" supuxo que o punto de partido sexa agora "mil millóns de euros" mellor que o ano anterior. Neste sentido, observa "unha rectificación" nunhas contas que o BNG quere mellorar en temas como ferrocarril, crise industrial, débeda "histórica" en dependencia, e, en definitiva, nun "trato xusto para Galicia. "Non teñen o voto afirmativo, hai temas importantes que deben ser corrixidos e emprazamos a PSOE e Podemos a dar un mellor trato a Galicia, porque hai moita marxe de mellora", salientou.

Pontón tamén quixo advertir de que estes orzamentos se debaten nun contexto de "preocupación" polos "recortes nas pensións negociados pola porta de atrás na UE", "bandazos" en canto á derrogación da reforma laboral que "dá a sensación de que é máis un parche" e o mantemento da Lei mordaza, que se "segue aplicando" de tal forma que mesmo chega a perseguir a quen "di que non é 'A Toja' senón A Toxa".

Neste escenario, Pontón lamentou "o último episodio, impresentable" no Congreso, coa renovación do Tribunal Constitucional. "Chama a atención que poida pasar cun goberno progresista. Non están a tragar un sapo, estanllo facendo tragar á cidadanía", lamentou.

DETALLE DAS EMENDAS

Pola súa banda, o deputado do BNG no Congreso, Néstor Rego, considerou que o punto de partida "é lixeiramente mellor" que o do ano pasado, o que, na liña do manifestado por Pontón, débese á "posición de firmeza" dos nacionalistas cos orzamentos de 2021, unha "discriminación flagrante que se volvía ocorrer, volvería ter enfronte ao BNG e ao conxunto da sociedade galega, que non podería entender un trato destas características". Rego explicou que o BNG introduciu emendas para a "imprescindible modernización" ferroviaria de Galicia, a conexión por exemplo entre A Coruña e Ferrol e o saída sur de Vigo e conexión con Portugal.

Os nacionalistas piden, así mesmo, a implantación do servizo de proximidade e a mellora da rede viaria convencional, como o mantemento da N-550, que vertebra tamén de norte a sur o eixo atlántico.

Ademais, presenta 200 millóns para a intervención pública de Alcoa, co fin de "salvagardar a totalidade dos postos de traballo"; 100 millóns para transformar Navantia, e que basee a súa actividade na construción naval civil; partidas para unha transición xusta --especialmente en Meirama, Cerceda e As Pontes, con proxectos pioneiros de I+d+i; un aumento global de 200 millóns de euros no ámbito social (para todo o orzamento); cambios na tributación con Facenda para que non se penalicen as pensións con dobre tributación ou aos traballadores que pasaron un Erte ou por varios contratos precarios; e tres xulgados de violencia de xénero (Ourense, Lugo e Santiago).

Entre outras medidas, pide tamén baixar o IVE da enerxía, de produtos culturais, hixiene feminina ou salóns de barbaría; xunto cunha partida de 50.000 euros para pedir un estudo desde o punto de vista técnico e xurídico que conclúa no rescate da concesión da AP-9, tras soster Europa que as prórrogas foron "ilegais".

CONTACTOS

Rego explicou que se mantiveron algúns contactos pero sen que se levou a cabo un "verdadeiro proceso de negociación" e mantivo que se trata dun proceso rápido, polo que debe facerse con certa celeridade.

Iso si, lanzou o aviso de que "sería un erro" que o Goberno se basease na "pura matemática" á hora de sacar as contas adiante, nun contexto como o actual, engadiu, con "maiorías que poden ser moi volubles e variables". "Cometería un erro, máis aló doutras consideracións", rematou.

O deputado do BNG no Congreso sinalou que á formación nacionalista "gustaríalle votar que si" ás contas, porque "iso significaría que serían boas para Galicia". Pero a decisión, advertiu, "non vai depender só" da postura dos nacionalistas galegos, senón das incorporacións ás contas das propostas sinaladas.

A portavoz nacional do BNG, Ana Pontón, xunto ao deputado no Congreso, Néstor Rego, en rolda de prensa para presentar as emendas aos orzamentos xerais do estado | Fonte: Europa Press