A Xunta defende a súa xestión para o control do xabaril e reclama un censo a nivel estatal

A directora xeral de Patrimonio Natural, Belén do Campo, reclamou un censo da poboación do xabaril a nivel estatal, durante a súa participación na Comisión 7ª de Agricultura, Alimentación, Gandaría e Montes do Parlamento galego.

Esta demanda, expuxo, foi trasladada xa ao Goberno central para dar un "tratamento global" a través dun plan de acción fronte ao xabaril, dixo ao defender as actuacións postas en marcha a este respecto pola Xunta a preguntas do deputado do BNG, Xosé Luís Rivas.

Leste asegurou que "non son os cazadores os elementos para o control da poboación" do xabaril. "Hai plans de xestión que hai que facer", esixiu o deputado nacionalista, quen apelou a combinar "diferentes solucións para afrontar os danos derivados" por esta especie, expuxo nunha pregunta sobre a emerxencia cinexética declarada en outubro de 2019.

Mentres, puxo en cuestión que haxa unha redución do número de avisos, como sostivo a directora xeral, que sinalou que de 910 no período entre 2018-2019 pasouse a 642 entre 2019 e 2020. "Non é real, non funciona, a xente está cansada de falar cunha máquina", sentenciou o deputado nacionalista achacando a ese motivo que haxa menos avisos.

CAMIÑOS NO RURAL

Na citada comisión, tamén interveu a directora xeral da Axencia Galega de Desenvolvemento Rural, A Inés Santé, quen fixo balance, en resposta a unha pregunta parlamentaria do PPdeG, ás actuacións da Administración autonómica para apoiar a mellora de camiños de titularidade municipal no rural galego.

Na súa intervención, sostivo que por parte da Consellería do Medio Rural destináronse case 18 millóns no últimos cinco anos dentro dos plans de infraestruturas rurais, entre os que se atopan tamén as vías municipais. Tamén sinalou que este ano o orzamento destinado ao plan de mellora de camiños aumentou un 20% respecto da convocatoria anterior, ata os 14,3 millóns.