Por E.P. | SANTIAGO DE COMPOSTELA | 06/03/2021 | Actualizada ás 19:32
A Deputación de Ourense apoiará a nova serie televisiva 'Hotel Valquiria', unha coprodución galego-portuguesa ambientada e rodada en diferentes localizacións na fronteira entre esta provincia e Portugal.
O presidente da Deputación, Manuel Baltar, confirmou a colaboración da institución ao presidente e ao produtor da compañía audiovisual CTV, Ghaleb Jaber e Ghaleb Jaber Martínez, respectivamente, tras unha reunión mantida no Pazo Provincial.
Baltar vincula este apoio á estratexia do seu goberno para demostrar o "gran estudo de cinema" que é Ourense. "De novo, a nosa provincia volve estar no máis alto das producións cinematográficas e televisivas", celebrou o presidente.
Neste contexto, dixo que 'Hotel Valquiria' recolle agora a testemuña de series previas como 'El desorden que dejas' ou 'O sabor das margaridas', que alcanzaron o 'top10' das máis vistas en Netflix España e o das de fala non inglesa en Reino Unido e Irlanda, respectivamente.
Tal e como avanza a Deputación, este novo proxecto producido pola galega CTV e a lusa SPi narra unha historia "ligada ás terras ourensás e aos seus valores: ser unha provincia aberta e ponte entre comunidades e países". En concreto, a serie está ambientada nun hotel fronteirizo entre Ourense e Portugal.
Esta obra mostra "un sentimento de unión con Portugal" plasmado a través do tránsito de hóspedes e personaxes a ambos os dous lados da 'raia'. As protagonistas son tres mulleres que, afundidas polos seus problemas persoais e económicos, deciden unirse nun plan delictuoso no medio do branqueo de diñeiro, mentiras, loitas de poder e perigo de morte.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.