Incautado en Galicia un exemplar de tartaruga en perigo crítico de extinción que se vendía en Internet

O Equipo de Seprona da Comandancia da Garda Civil da Coruña interveu un exemplar de 40 centímetros de tartaruga carey —eretmocheys imbricata—, que se atopa en perigo crítico de extinción, que se ofertaba a través dunha plataforma de compravenda en Internet.

A investigación tivo lugar cando a Garda Civil detectou a venda do réptil, como "peza decorativa", nunha páxina de transaccións entre particulares, informou o Instituto Armado.

Unha vez localizada a propietaria, esta non puido acreditar a tenencia legal do exemplar, aínda que admitiu traela da República Dominicana, indicaron as mesmas fontes.

Por todo iso procedeuse a levantar acta por infracción administrativa de contrabando, "por realizar sen cumprir cos requisitos legalmente establecidos, operacións de importación, exportación, comercio, tenencia ou circulación de especímenes, fauna e flora silvestres e as súas partes e produtos, de especies recollidas no Convenio CITES, e no Regulamento(CE)Número338/97, do Consello, de 9 de decembro de 1996", expoñen as mesmas fontes.

Os feitos enmárcanse no Plan de Acción Español contra o tráfico ilegal e o furtivismo internacional de especies silvestres. A tartaruga quedou depositada na Dependencia Rexional de Aduanas e Impostos Especiais da Coruña.