Máis de 4.000 persoas asinan en Internet unha iniciativa para preservar o patrimonio do Centro Galego de Buenos Aires

Unha iniciativa rexistrada na plataforma online 'Change.org' solicitou máis de 4.000 firmas para instar as institucións galegas a que se impliquen na preservación do patrimonio "inmobiliario, artístico e cultural" do Centro Galego de Buenos Aires, que atravesa unha delicada situación económica que obrigou a pór en venda a súa histórica sede.

Así, o manifesto da petición --que arrincou o pasado 28 de xaneiro, día no que se cumpriron 132 anos do nacemento de Castelao-- fai un chamamento os "representantes políticos" de Galicia --Xunta, Parlamento, RAG, Consello da Cultura Galega e universidades-- a defender "a transcendental importancia" do legado da "emblemática" e centenaria institución.

"Hoxe require da cidadanía galega unha posición firme de defensa ante o perigo da súa desaparición", reza o texto, que sinala o "respecto" á lexislación arxentina "que protexe os seus bens artísticos e culturais", así como a "a colectividade galega do mundo que conforma unha Galicia universal allea a límites artificiais" e as "decisións soberanas" das agrupacións do Centro Gallego.

Así as cousas, pide que a Xunta e o Goberno español impulsen "actuacións concretas" para "solucionar definitivamente o gravísimo problema" ao que se enfronta a institución e que, deste xeito, exista "vontade política" desde as administracións para "preservar e garantir a atención médica de calidade dos actuais socios e socias".

Ademais, reclama a protección do "patrimonio artístico, documental, bibliográfico, editorial" que alí se alberga e solicita o esforzo de Estado e Xunta para "acordar unha solución que impida a demolición e a especulación inmobiliaria dun predio que debe seguir sendo referente de Galicia en Buenos Aires".

"A simboloxía do edificio e a función sanitaria, social e cultural do actual Centro Galego ofrece moitas e moi variadas posibilidades para que a Galicia do século XXI siga sendo unha das identidades que conforman a capital porteña, as gran metrópole --como lle chamou Otero Pedrayo-- que acolleu a miles de galegos e galegas", conclúe.

A petición foi asinada por diferentes personalidades do ámbito cultural, social e político de Galicia, como o presidente da RAG, Víctor F. Freixanes, o secretario xeral do Partido Galeguista, Francisco López 'Chesqui, o presidente do Consello da Cultura Galega, Ramón Villares, ou os tres reitores das universidades galegas, Salustiano Mato (Vigo), Juan Viaño (Santiago) e Julio Abal (A Coruña), entre outras moitas.