Por E.P. | SANTIAGO DE COMPOSTELA | 19/01/2018 | Actualizada ás 13:45
A Asociación para a Recuperación da Memoria Histórica (ARMH) pediu ao Parlamento de Galicia que "renda homenaxe" a 179 republicanos galegos deportados aos campos de exterminio nazis.
A petición, segundo traslada a Asociación nun comunicado, foi enviada por rexistro o pasado 21 de decembro, dirixida ao xefe do Lexislativo, Miguel Santalices. Tamén indicou que aínda non obtivo resposta. Lembrou que o próximo 27 de xaneiro de 2018 celébrase en todo o mundo o Día Internacional en Conmemoración das Vítimas do Holocausto.
Ao fío, apuntou que en diversas institucións españolas celébranse actos de recordo, pero "adóitase esquecer" que "máis de 10.000 republicanos españois acabaron deportados nos campos nazis". Tamén incidiu en que a deportación dos republicanos españois, "aos que o franquismo lles retirou previamente a nacionalidade, non se entende sen o seu exemplo de loita no territorio español contra os exércitos de Hitler, Franco e Mussolini.
179 ORIXINARIOS DE GALICIA
Dos máis de 10.000 republicanos españois, un total de 179 eran orixinarios de Galicia: 78 procedentes da Coruña, 33 de Lugo, 34 de Ourense, e 34 de Pontevedra.
A Asociación para a Recuperación da Memoria Histórica, co "compromiso" de manter viva a memoria de todas as persoas que sufriron o Holocausto, pide ao Parlamento que se faga un acto de conmemoración o próximo 27 de xaneiro no que se lean os nomes "de todos os galegos que foron obrigados a subirse nos trens da morte".
"Que morreron alí ou que foron liberados, pero nunca puideron regresar ao lugar no que naceran porque a ditadura franquista negoulles o dereito a regresar ao seu país de orixe", sostén a Asociación.
TRASLADO AOS GRUPOS
Fontes parlamentarias consultadas por Europa Press ratificaron que a Mesa, órgano reitor do Lexislativo galego, tomou coñecemento do escrito e na Xunta de Portavoces deu traslado aos grupos da petición.
As mesmas fontes incidiron en que tamén está sobre a mesa a proposta dunha declaración institucional en relación ao Holocausto --é habitual que o Parlamento se pronuncie e ocorreu en anos anteriores, aínda que para que salga adiante é necesario que haxa acordo de todos os grupos con representación no hemiciclo galego--.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.