Divisións no PP galego sobre a comisión de investigación de Angrois

O presidente da Xunta, Alberto Núñez Feijóo, e o seu ex conselleiro e candidato do PP en Santiago, Agustín Hernández, manteñen posturas contrarias sobre a necesidade de crear unha Comisión de Investigación sobre o accidente de tren de Angrois no Congreso. Así, mentres que Feijóo criticou este xoves que a elección dun novo secretario xeral poida levar ao PSOE a "dicir o contrario do que dixo" sobre esta comisión, o seu ex conselleiro, dixo que o PP "debería reflexionar" para apoiala.

"É un tema estrutural, de crer que é o mellor para reparar uns danos que son irreparables", defendeu o dirixente popular ao ser preguntado na rolda de prensa posterior ao Consello da Xunta sobre a posibilidade de que a Cámara baixa aprobe a constitución deste órgano co voto favorable do PSOE.

Desde o convencemento de que "a prioridade" é a vía xudicial, si lembrou que está aberto a que, unha vez conclúan os seus traballos, no Congreso dos Deputados se poida constituír "unha comisión de expertos" que investigue "con maior intensidade" o ocorrido o 24 de xullo de 2013 no barrio compostelán de Angrois.

A continuación, o mandatario autonómico admitiu que "non é fácil situarse" ao redor das peticións das vítimas sobre as investigacións. "Ás veces, unha cousa é o que che pide a cabeza e outra o que che pide o corazón", manifestou, aínda que opinou que cando un ocupa un cargo público debe seguir "os designios da cabeza".

Iso si, Feijóo asegurou que entende "perfectamente" que no seu partido haxa persoas con "outra visión e outra formulación". "É absolutamente razoable", finalizou.

Precisamente este xoves, nunha entrevista radiofónica, o portavoz do PP de Santiago, Agustín Hernández, advertiu que "o Partido Popular debería reflexionar respecto diso do seu posicionamento" sobre a posibilidade de crear unha comisión de investigación no Congreso sobre o accidente do tren Alvia en Angrois.

Críticas de Hernández

"Eu non teño ningunha dúbida respecto diso e do resultado dunha investigación a nivel político. Obviamente non estou de acordo en que esa comisión tivera lugar no Parlamento de Galicia, posto que as competencias non residen en Galicia", dixo.

Pero, a continuación, destacou que, "respecto da posible comisión de investigación no Parlamento de España", cre "que o Partido Popular debería reflexionar sobre o seu posicionamento", que ata agora foi sempre contrario á súa constitución.

Hernández foi preguntado sobre se debería sumarse tamén o PP, tendo en conta que o PSOE galego apoiou a semana pasada pedir a comisión nas Cortes e está por ver que decide a nova dirección do grupo socialista na Cámara Baixa --varios deputados como Odón Elorza, Zaida Cantera, Pilar Cancela e Ricardo García Mira están a favor de que se cre--.

"Estamos a falar de vítimas e dun episodio tráxico da cidade. Eu tiven por desgraza a oportunidade de estar nese punto desde o mesmo momento do accidente e a verdade creo que é un tema que deberiamos abordar desde a perspectiva de buscar o mellor para que os familiares e as persoas relacionadas coas vítimas tivesen toda a seguridade de que todo queda clarificado", expuxo.

De feito, Hernández era conselleiro de Medio Ambiente, Territorio e Infraestruturas por entón, e acudiu ao lugar do descarrilamento para seguir en primeira persoa o desenvolvemento do operativo de emerxencias.