Polémica en Sarria pola anulación dun convencio coa editorial que dirixiu o deputado Fernán Vello
Os votos do PP e a abstención de antigos concelleiros de CxG provocaron que se lle retire a publicación do premio Fiz Vergara Vilariño á editorial Espiral Maior. A Agrupación cultural Ergueitos critica que se intente politizar a cultura.
Por Galicia Confidencial | Sarria | 03/10/2016 | Actualizada ás 10:00
A cultura acaba de ser politizada en Sarria. Iso é o que opina a agrupación cultural Ergueitos de Sarria que defende que a obra gañadora do premio de poesía Fiz Vergara Vilariño continúe sendo publicada pola editorial Espiral Maior. O colectivo fixo esta petición despois de que o pleno reprobase o xoves ao deputado de En Marea Miguel Anxo Fernán Vello polos seus comentarios sobre os galegos como pobo "alienado" tras os resultados das eleccións autonómicas do pasado domingo.
Así, o pleno do concello aprobou cos votos a favor do PP e de ex concelleiros de CxG e o voto en contra de PSdeG e BNG, modificar as bases do galardón para que a obra gañadora non sexa publicada a partir de agora por esa editorial.
“Reprobar as declaracións do deputado é unha decisión máis do xogo no que se entra non exercicio da política", salientou a presidenta de Ergueitos, María Casar, que considera que vincular esas declaracións do deputado co premio Fiz Vergara Vilariño é "un despropósito".
Ademais, afirmou que desde hai uns meses Fernán Vello non ten responsabilidade de dirección na editorial. "Espiral Maior ten un administrador que non é Fernán Vello, ou non forma parte da estrutura da editorial. Así esta escriturado e así consta no rexistro mercantil. É bo documentarse", manifestou Casar nun comunicado.
Poesía, cultura e debate político
Así, destaca que para reprobar a Espiral Maior deberíanse empregar argumentos que afecten ao cumprimento dos seus deberes neste premio; “da consecución dos compromisos adquiridos e do desenvolvemento do estipulado nas bases”. Así, lembra que forma parte das bases que a obra premiada será editada en Espiral Maior porque é unha editorial de recoñecido prestixio, valorada polas poetas como a mellor plataforma para chegar ao público lector.
“Cuns case 300 títulos editados na colección na que se inclúe o Fiz Vergara de poesía e cen máis noutras coleccións. Con 25 anos de dedicación á edición de poesía que fan dela un aval para o premio”, apunta. “Non só estamos tratando da empresa editorial Espiral Maior. Estamos falando do Premio que nos enriquece como concello e como comarca e que vai unido indefectiblemente ao nome de Sarria. A poesía e a cultura están por riba deste debate político. Porque son iso: poesía, cultura, palabra escrita que se vai pero permanece”, conclúe.
