As vítimas nas estradas aumentan un 48% en Galicia no que vai de ano
A DGT incrementa os controis.
Por Europa Press / Redacción | SANTIAGO DE COMPOSTELA | 10/05/2024 | Actualizada ás 12:27
A Dirección General de Tráfico (DGT) activou en Galicia un "plan de choque" con aumento dos controis e as medidas de prevención polo aumento da sinistralidade, ao rexistrarse 37 mortos entre xaneiro e abril deste ano.
Así o expuxo o delegado do Goberno en Galicia, Pedro Blanco, na presentación desta medida, de ámbito estatal, tras o incremento en España nun 16 por cento das vítimas na estrada entre xaneiro e marzo. "En Galicia elevouse a un 48%", sinalou aos medios de comunicación o delegado do Goberno, quen apuntou tanto en relación a este incremento como á cifra de número de falecidos que son datos "inaceptables".
"Lembra a vellos tempos que tiñamos superados", sinalou para aludir, ademais, en particular, aos colectivos vulnerables que representan o 40 por cento dos falecidos, apuntou en referencia a peóns, ciclistas e motociclistas. "O que estamos a ver nas estradas é inaceptable", insistiu Branco quen rexeitou que haxa un obxectivo recadatorio. "O responsable da sanción é quen comete a infracción", apostilou.
CAUSAS
En canto ás causas, vinculounas con que "as persoas prestan cada vez menos atención" e incidiu en que as distraccións están na principal causa dos sinistros, seguido da velocidade inadecuada. "Isto provoca colisións frontais", indicou relacionando a isto os 12 falecidos entre xaneiro e abril.
"Hai unha relaxación das medidas de seguridade como o uso do cinto, o aumento velocidade ou consumo de alcol, fenómenos que detectamos desde a pandemia e que se estenden", recalcou, ademais de aludir ás neglixencias.
