A Xunta sostén que actualizará o Pladiga, mentres o PSdeG alerta de falta de prevención
O grupo parlamentario socialista tamén preguntou sobre accións para a produción da viticultura tradicional da Ribeira Sacra.
Por Europa Press / Redacción | SANTIAGO DE COMPOSTELA | 07/05/2024 | Actualizada ás 16:27
O director xeral de Defensa do Monte, Manuel Rodríguez, asegurou que a Xunta actualizará o Plan de prevención e defensa contra os incendios forestais de Galicia (Pladiga), mentres lembrou ao PSdeG que este plan "xa está aprobado" e o que se aproba agora son "actualizacións". Así respondeu o representante autonómico na Comisión 7ª de Agricultura, Alimentación, Gandaría e Montes no Parlamento de Galicia a unha pregunta dos socialistas sobre o estado no que se atopa a tramitación do proxecto do Pladiga para este ano e o proceso de participación do Consello Forestal.
Na súa formulación, a deputada do PSdeG Carmen Rodríguez Dacosta reprochou á Xunta que limite as tarefas de prevención a "facer a danza da choiva" e a "encomendarse a manitú". Así, criticou a "falta de publicación do Pladiga", algo que lle reprochou o director xeral de Montes, argumentando que este plan "non se aproba, apróbanse as actualizacións". "Todos os anos estamos con este mantra de que a Xunta presenta tarde o Pladiga. O Pladiga xa está, existe. Se falamos das actualizacións do Pladiga periodicamente, non poden dicir que non o temos aprobado", criticou.
En todo caso, lembrou que esta actualización se realizou nos últimos anos en datas ao redor de finais do mes de maio ou principios de xuño, con excepción do ano 2023, cando se fixo o 27 de abril. A pesar disto, Manuel Rodríguez insistiu en que están "na media do últimos cinco anos", polo que considera que non é un atraso "inxustificado". Así mesmo, o director xeral defendeu que Galicia foi "pioneira" en incorporar o plan preventivo que, na súa opinión, "non existía a nivel estatal".
VITICULTURA TRADICIONAL NA RIBEIRA SACRA
Por outra banda, nesta mesma comisión, o grupo parlamentario socialista tamén preguntou ao Goberno autonómico sobre as accións que prevé pór en marcha para impulsar a produción da viticultura tradicional da Ribeira Sacra.
Neste sentido, a deputada do PSdeG Lara Méndez expuxo que a denominada viticultura 'Heroica' ou 'Extrema' que se mantén nesta zona é "clave" na dinamización económica, non só pola actividade produtiva, senón por "a súa capacidade de atracción dun turismo sustentable".
Ademais, puxo en valor a candidatura a Patrimonio da Humanidade e reivindicou os bancales da Ribeira Sacra, aínda que lamentou que "apenas un 5% do chan" está dedicado a esta forma de cultivo, que conta coa súa propia Denominación de Orixe desde 1996.
Neste contexto, Lara Méndez demandou á Xunta a creación dunha liña de axudas para manter e aumentar a produción desta viticultura tradicional na Ribeira Sacra. Ante isto, o director da Axencia Galega de Calidade Alimentaria, José Luís Cabarcos, defendeu que xa hai axudas contempladas na a nova etapa de programación de fondos europeos (PEPAC).
En concreto, asegurou que existen liñas de axudas, como os gastos de funcionamento dos consellos reguladores, os programas de control, os programas e actividades relacionadas coa promoción do viño, axudas de reestruturación e reconversión do viñedo, para o investimento en adegas e de promoción do viño en terceiros países. "Se sumamos todas estas liñas, só na Ribeira Sacra falamos de aproximadamente un millón de euros", relatou.
Ademais, reivindicou que "a clave" é evitar o abandono e o cambio xeracional, "que vexan que é rendible, de futuro, e que non só serve para manter o nivel, senón que dá a oportunidade de crecer". Doutra banda, este martes tamén se aprobou a elección do deputado popular José Manuel Mato Díaz como vicepresidente desta comisión co voto a favor do PPdeG e a abstención dos parlamentarios da oposición.
