O Sergas convoca case 160 prazas de técnico superior de especialidades sanitarias

O Diario Oficial de Galicia (DOG) publicou este martes a convocatoria de 158 prazas por concurso-oposición para o ingreso no Servizo Galego de Saúde (Sergas) en catro categorías de persoal sanitario de formación profesional. En concreto, ofrécense 121 prazas de técnico superior en laboratorio de diagnóstico clínico, das que 54 son de acceso libre, seis de discapacidade xeral e 61 de promoción interna. Ademais, o concurso inclúe 16 prazas de técnico superior en dietética: sete libres, oito de promoción e unha de discapacidade.

Tamén se convocan 13 prazas de técnico superior en documentación sanitaria, das que cinco son libres e unha de discapacidade, así como oito de técnico en anatomía patolóxica e citoloxía, coa metade de acceso libre e a outra metade de promoción interna. Tal como informou a Xunta nun comunicado, o proceso desenvolverase mediante tres exercicios na fase de oposición e na baremación dos méritos correspondentes na fase de concurso.

Entre a experiencia que se valorará, o Sergas outorgoulle unha puntuación adicional aos servizos prestados en centros sanitarios considerados illados e a aqueles que traballaron durante a pandemia. Os aspirantes teñen un mes a partir deste mércores para presentar as súas solicitudes de participación.

Miles de aspirantes realizan as oposicións en Silleda | Fonte: Álvaro Ballesteros - Arquivo