Miñones deixa a súa acta de deputado para presidir Mercasa
Mercasa é unha emprea pública de xestión e información da cadea alimentaria
Por E.P. | Madrid | 09/04/2024 | Actualizada ás 15:59
O que fose ministro de Sanidade e delegado do Goberno en Galicia, José Miñones, deixou a súa acta como deputado no Congreso para ser proposto presidente de Mercasa, empresa pública de xestión e información da cadea alimentaria.
O que tamén fose alcalde de Ames presentou este martes, día 9 de abril, un escrito á mesa da Cámara baixa no que comunica a súa renuncia, tal e como coñeceu Europa Press. No texto, ademais, manifesta o seu agradecemento aos servizos da Cámara polas atencións recibidas.
Fuentes consultadas por Europa Press informaron de que se prevé que a Sociedade Estatal de Participacións Industriais (SEPI) propoña a José Miñones como presidente de Mercasa, no consello de administración que se celebrará este mércores.
Tras o seu paso pola Delegación do Goberno en Galicia, Miñones foi nomeado en marzo de 2023 ministro de Sanidade, un cargo que ostentou ata novembro de 2023.
Nas eleccións xerais do 23 xullo, o exalcalde de Ames encabezou a candidatura do Partido Socialista pola provincia da Coruña. Por esta circunscrición, o PSOE logrou tamén o escano que ocupa a coruñesa Obdulia Taboadela.
Coa marcha de Miñones, conforme ratificaron fontes socialistas, entrará na Cámara baixa a que fose edil das Pontes, Monterrat García Chavarría, que ocupou o número tres na lista. Foi deputada no Congreso na anterior lexislatura.
