As confrarías de Semana Santa de Ferrol fan un balance "agridoce" debido ás condicións meteorolóxicas
As irmandades puxeron en marcha iniciativas de beneficencia, cunha moi boa resposta.
Por E.P. | Ferrol | 05/04/2024 | Actualizada ás 19:01
O presidente da Xunta de Confraría e Irmandades da Semana Santa de Ferrol, César Carreño, valorou a edición que acaba de finalizar como "agridoce", pola adversa meteoroloxía e as seis procesións que houbo que cancelar, aínda que tamén mostrou como elemento positivo o "tirón" da Paixón ferrolá e o efecto multiplicador que ten para a cidade.
Así o explicou durante unha rolda de prensa na que detallou o acontecido entre o Domingo de Ramos e o de Resurrección, destacando o volume dos actos solidarios que as irmandades desenvolveron este ano, en moitos casos por primeira vez, e a recadación que deixaron, ben en metálico ou en alimentos, para distribuír a través de diferentes entidades a colectivos desfavorecidos.
Así, mostrou a súa satisfacción polo resultado da recadación que realiza a irmandade das Angustias durante o Sábado Santo, con destino ao refuxio Pardo de Atín da Fundación do Santo Hospital de Caridade, con ata un total de 6.076,64 euros, que marcan un récord nos 68 anos que leva celebrándose.
Ademais, por primeira vez tamén a Irmandade do Santo Enterro entregou, durante o Sábado Santo, flores a cambio de donativos e recolleu ao redor de 700 euros. A Confraría de Dolores recadou entre os seus confrades 1.600 euros de doazóns entregadas tamén a cambio das flores dos tronos e reuniu 260 quilos de alimentos non perecedoiros na recollida que organizou nos locais que temporalmente ocuparon os seus terzos.
A Confraría da Soidade, aínda que por estatutos non pode publicar a cantidade, dedica a beneficencia o 10% da recadación polos hábitos e por último, a Confraría da Mercé reuniu case 400 euros co seu Ensaio Solidario, e unha cantidade case idéntica durante a vixilia do Sábado Santo, que vai entregar a unha fundación de loita contra o cancro infantil.
DIFUSIÓN
César Carreño tamén quixo incidir na difusión que a Semana Santa de Ferrol, declarada desde hai dez anos de Interese Turístico Internacional, tivo a través da canle de Youtube e das redes sociais. Os streamings das procesións bateron unha marca con 111.000 visualizacións e picos de 800 persoas vendo simultaneamente unha retransmisión.
A canle da Xunta de Confrarías supera actualmente os 1.900 subscritores que están en puntos tan distantes "como Birmania, Vietnam, Malasia, Cambodia ou Arabia Saudita" e durante as emisións solicitáronse, "como curiosidade, traducións automáticas en inglés, portugués, polaco e árabe".
