A Xunta venderá 369 prazas de garaxe e 142 baixos comerciais, a maioría en cidades
É a primeira gran poxa de propiedades da Xunta desde 2016.
Por Europa Press / Redacción | SANTIAGO DE COMPOSTELA | 14/03/2024 | Actualizada ás 15:26
A Xunta sacará a poxa 369 prazas de garaxe e 142 baixos comerciais para aluguer ou compra situados en edificios de promoción pública de titularidade autonómica, a maioría situados en cidades galegas.
Trátase dunha poxa que levaba sen ser convocada desde o ano 2016 e que será activada proximamente pola Administración galega, como foi acordado na reunión do Consello da Xunta deste xoves.
Segundo explicou na comparecencia de prensa o presidente galego en funcións, Alfonso Rueda, a Xunta estima unha "demanda importante" de cara a este proceso, dado que "a maioría" dos inmobles onde se sitúan están en cidades. Os baixos e prazas de garaxe sairán a poxa para o seu aluguer ou venda, aínda que terán prioridade aqueles que aposten por unha adquisición.
