Catro detidos por tallar árbores sen autorización dos donos para a súa venda nun serradoiro da Rúa
A Garda Civil valorou o material roubado en 126.800 euros.
Por Europa Press / Redacción | OURENSE | 29/02/2024 | Actualizada ás 18:34
Un total de catro persoas foron detidas no marco da Operación 'Sosna' acusadas de tallar árbores en leiras alleas, sen autorización dos propietarios, para a súa venda nun serradoiro da Rúa (Ourense). A Garda Civil da Rúa, que valorou en 126.800 euros o material subtraído, desarticulou ao grupo criminal dedicado a delitos contra o contra o patrimonio, que falsificaba declaracións de propietarios para obter permisos de talla na Consellería de Medio Rural da Xunta de Galicia.
Nun comunicado, o instituto armado informou de que iniciou a investigación en 2022, tras ter coñecemento de varias denuncias que alertaban da talla de árbores sen autorización dos propietarios.
En todos os casos describíase un patrón similar de actuación e, en todos eles, subtraíase unha gran cantidade de piñeiros e castiñeiros, procedentes de leiras de explotacións agrícolas. A Garda Civil sinalou que o 'modus operandi' consistía na localización da leira e a falsificación das declaracións responsables de poda da Xunta de Galicia. Tras iso, procedían á talla e subtracción das árbores para trasladalas a un serradoiro de madeiras, na Rúa, que era o encargado de introducir a materia prima no mercado.
Os detidos son un veciño de Portugal de 59 anos, outro da Rúa de 43, un home de Ríos de 57 anos e un veciño de Petín de 65. A eles impútanselle 29 delitos de furto, 17 delitos de falsificación de documento público, un delito de receptación e outro de pertenza a grupo criminal e toma declaración en calidade de investigado ao dono do serradoiro.
As dilixencias foron postas a disposición do Xulgado de Instrución número uno do Barco de Valdeorras.
