Marta Lois á universidade aínda que continuará ligada a Sumar nun posto que decidirá "a futuro"
Lois cre que, como organización "en construción", o partido de Díaz debe "mirar cara adiante" en Galicia.
Por Europa Press / Redacción | SANTIAGO DE COMPOSTELA | 22/02/2024 | Actualizada ás 20:33
A candidata de Sumar Galicia á Presidencia da Xunta nas pasadas eleccións galegas, Marta Lois, anunciou que se reincoporará ao seu posto como docente na Universidade de Santiago de Compostela, pero continuará ligada a Sumar nun papel que decidirá "a futuro".
Así o avanzou en declaracións aos medios este xoves en Santiago antes da primeira reunión da promotora de Sumar Galicia tras o revés electoral do pasado domingo, no que a candidatura encabezada pola exportavoz de Sumar no Congreso quedou fóra do Parlamento galego ao obter menos do 2% dos votos emitidos.
Acompañada polo portavoz do partido de Yolanda Díaz en Galicia, Paulo Carlos López; Lois sinalou que a decisión de regresar á súa actividade profesional como profesora na Facultade de Ciencias Políticas de Santiago non supón a súa desvinculación do proxecto da que foi portavoz e deputada nas Cortes, cargos aos que renunciou para ser cabeza de lista o pasado 18 de febreiro.
"Temos uns obxectivos e unhas datas moi importantes en breve, tanto o 23 de marzo (I Asemblea estatal) como as eleciones europeas, e eu vou estar aí construíndo, tecendo e acompañando en todo este proceso para organizar a estrutura", afirmou Lois, que subliñou a necesidade de "mirar ao futuro".
Cuestionada sobre que papel desempeñará a nivel orgánico a partir de agora, Lois evitou concretar se pretende asumir un rol protagonista ou se aposta por exercer unha función en segunda liña. "Vou seguir estando no proxecto colectivo de Sumar Galicia remando colectivamente e, a partir de aí, iremos vendo, despois destas datas, cal vai ser o meu rol e cal será o meu papel a futuro", apostilou.
Para a exconcelleira de Compostela Aberta, Sumar debe afrontar unha nova etapa despois duns "malos resultados" nas urnas que considera que se debeu á "falta de tempo" para que o seu proxecto chegase aos galegos tras unha campaña "adiantada" polo presidente da Xunta e líder do PPdeG, Alfonso Rueda.
En todo caso, cre que, como organización "en construción", o partido de Díaz debe "mirar ao futuro" en Galicia. Nesa mesma liña manifestouse o portavoz, Paulo Carlos López, que indicou que é o momento "de construír e de asentarse territorialmente para ter futuro" como organización tras uns resultados nas urnas "malos, sen paliativos".
Con todo, cre que poderán extraer leccións de face aos seguintes retos de Sumar Galicia, que sitúa, ademais de en o desenvolvemento "territorial" da organización, no I Asemblea estatal de mediados do mes de marzo e nas eleccións europeas de xuño.
