Debate 18F.- Pontón e Besteiro acusan a Rueda de "candidato ausente" no debate de TVE
Pontón e Besteiro coinciden en asuntos como a rexeneración das rías e a mobilización de terras.
Por Europa Press / Redacción | SANTIAGO DE COMPOSTELA | 14/02/2024 | Actualizada ás 23:28
A candidata do BNG á Presidencia da Xunta, Ana Pontón, considerou que as zonas produtoras de enerxía teñan tarifa máis barata e o aspirante socialista a liderar San Caetano, José Ramón Gómez Besteiro, avogou por converter o excedente en industria e en emprego para Galicia.
Os dous candidatos trasladaron as súas propostas en materia de enerxía e industria no arranque do debate que este mércores acolle RTVE, unha cita á que non asistiu o presidente da Xunta e aspirante á reelección polo PP, Alfonso Rueda, ao que ambos os políticos se referiron como "o candidato ausente".
Na súa intervención, Pontón considerou necesario rebaixar a parte política da tarifa eléctrica. "Na tarifa eléctrica toda unha serie de compoñentes son decisións do Estado, e nós o que dicimos é que as zonas produtoras teñan unha tarifa máis barata", dixo Pontón, que sostivo que "non é un problema legal", senón "un problema de vontade política".
Así mesmo, a nacionalista, que defende que os galegos teñan unha tarifa da luz máis barata, asegurou que o debate enerxético "vai moito máis alá da tarifa" e apostou por levar adiante unha transición enerxética con enerxías renovables que revertan na industrialización do país. "Ata o momento non foi así", afirmou.
Pola súa banda, Besteiro sinalou que Galicia é un territorio que produce máis electricidade da que consome. "Pero o que non é tan bo é que ese excedente non se traduza en industria e en emprego", sostivo para asegurar que lle había que preguntar por este feito ao "candidato ausente" nun contexto no que Galicia perdeu nestes últimos 15 anos "peso industria".
Besteiro incidiu na importancia de impulsar a "reindustrialización". "Un obxectivo que non só compartimos os socialistas en Galicia, senón en España e en Europa", sinalou para enmarcar a reindustrialziación dos territorios como un dos obxectivos do socialismo.
Para lograr este fin, o aspirante socialista á Xunta apostou por mobilizar un fondo con 10.000 millóns nos próximos anos con investimentos da UE, do Estado e da propia Xunta, así como un gran acordo de país en materia de emprego que permita subir catro puntos a porcentaxe da industria no PIB e lograr unha horquillad e máis de 100.000 empregos.
Pontón, con todo, apostou por elevar oito puntos o peso da industria a través dun plan industrial e tamén propuxo un plan de ciencia. Ademais, a nacionalista referiuse a a situación da planta de Alcoa en San Cibrao, para apostar pola intervención, unha cuestión á que non se referiu o socialista.
Neste bloque, Besteiro tamén aproveitou para pór en valor as medidas postas en marcha polo Executivo de Pedro Sánchez para lograr abaratar a tarifa da luz, como a excepción ibérica, un punto ao que se referiu Pontón para asegurar que esta excepción ibérica "axuda a entender a excepción galega" que o BNG propón. "Pedimos que as nosas empresas sexan máis competitivas e compénsellenos", dixo.
DESPOBOAMENTO E SECTORES PRIMARIOS
O político socialista foi o encargado de abrir o segundo dos bloques, un momento que aproveitou para lanzar cinco medidas en contra do despoboamento. Así, propuxo que todos os galegos, con independencia do lugar no que vivan, teñan acceso aos servizos públicos a non máis de 30 minutos. Ademais, apostou por limitar a 48 horas a espera para ser atendido por un médico de cabeceira.
Besteiro considerou necesario aproveitar todos os fondos da Unión Europea. "Non pode ser que en Galicia a Xunta sexa incapaz de xestionar estes fondos", dixo para propor tamén un impulso da vivenda pública tamén nas zonas despobladas. Ademais, comprometeuse a conseguir a gratuidade da AP-9 e a AP53.
Pola súa banda, neste apartado e en referencia ao medio rural, Pontón censurou que Roda non acudise á cita para "explicar os resultados" das súas medidas no medio rural despois de anunciar que esta ía ser a "lexislatura do rural".
"Con todo, nestes 15 anos de goberno do PP o que vemos é como desapareceron máis de 28.000 explotacións, máis de 15.000 empregos no sector agrogandeiro... Temos un problema de despoboamento que é brutal...", lamentou para referirse tamén ás protestas que se rexistran nos últimos días.
"Creo que en moitas das súas demandas teñen moita razón", dixo para lamentar que os custos non estean a ser compensados aos produtores pese ao incremento do prezo da cesta da compra e comprometeuse a garantir o cumprimento da Lei de Cadea Alimentaria.
Neste punto, así mesmo, reclamou recuperar os contratos homologados que garantan prezos xustos e apostou por mobilizar terra abandonada a través do banco dunhas terras que realmente poña eses terreos ao servizo dos produtores.
Neste punto, Besteiro, que tamén apostou por recuperar as terras que están a ser improductivas, incidiu na falta de capacidade da Xunta para crear un grupo industrial lácteo galego como forma de xerar valor engadido e avogou por pór en marcha un observatorio que controle os custos de produción.
PESCA
Ademais, no debate, Pontón considerou que sería importante que Alfonso Rueda estivese presente para explicar como a súa formación apoiou a un Milei que está a pór en risco a unha frota tan importante como a galega.
Tras iso, incidiu na problemática das rías galegas, que derivou nun "descenso da produtividade brutal", polo que considerou que a rexeneración destes espazos ten que ser "unha prioridade". "Temos que rexenerar as rías non só para coidar o medio ambiente, senón para crear emprego", dixo.
Neste punto, Besteiro tamén incidiu na importancia de garantir a rexeneración das rías e puxo como exemplo diso o labor do Goberno para recuperar a ría do Burgo. Ademais, chamou a atención sobre o descenso do consumo do peixe nos últimos anos e considerou necesario ter peso en España, en Europa e mesmo noutros países como Arxentina para defender os intereses da frota galega.
