Comesaña di que Sanidad tivo "un momento de cordura" tras acceder a revisar os criterios para formar máis médicos
Por E.P. | SANTIAGO DE COMPOSTELA | 10/02/2024 | Actualizada ás 16:20
O conselleiro de Sanidade, Julio García Comesaña, celebrou que o Ministerio de Sanidade accedese a "abrir unha vía de traballo" para revisar os criterios de acreditación das unidades docentes para poder formar a máis médicos de familia, "tras seis anos sen mover un dedo".
En declaracións aos medios este sábado en Monforte de Lemos, o responsable do departamento autonómico valorou a reunión celebrada este venres do Consello Interterritorial de Sanidade onde, apuntou, o Ministerio tivo "por fin un momento de cordura".
"Tras seis anos reclamando todas as comunidades autónomas que se abordase dunha vez ao que se comprometeu o Ministerio en 2018 de revisar os criterios, despois de seis anos sen mover un dedo neste sentido, ante a presión de todas as comunidades, ao Ministerio non lle quedou máis remedio que abrir unha vía de traballo", sinalou Comesaña.
O conselleiro lembrou que se trata dunha cuestión "fundamental" para poder formar a máis médicos de familia e, así, "resolver o maior problema que ten a sanidade pública en Galicia e en España, que é a falta de médicos".
