Por Europa Press / Redacción | VIGO | 05/02/2024 | Actualizada ás 15:02
A sección quinta da Audiencia Provincial de Pontevedra, con sede en Vigo, ditou sentenza na que impón penas de entre 2 anos e 3 meses de prisión para tres acusados de estafar máis de 740.000 euros ao antigo Banco Pastor, un deles interventor da entidade, primeiro nunha oficina de Sanxenxo e logo en Vigo.
O tribunal provincial considera probado que os procesados eran socios dunha empresa dedicada á construción e reparación de edificios e que, para lograr liquidez para esta empresa, idearon un sistema de libramiento de pagarés en base a operacións ficticias.
Coa cooperación do acusado que traballaba no banco, conseguiron que a empresa tivese abertos varios expedientes de desconto e, ao esgotar o límite de diñeiro, servíronse de contas de terceiros sen a súa autorización. Deste xeito, lograron 743.588 euros do Banco Pastor.
A Audiencia Provincial aplicou neste caso a atenuante de dilacións indebidas, xa que o procedemento iniciouse en 2011; así como a atenuante de reparación do dano, porque os acusados consignaron, antes do xuízo, 100.000 euros para facer fronte á responsabilidade civil.
O tribunal provincial condenou aos tres por un delito continuado de estafa agravada. Así, a un deles imponlle dous anos de cárcere e o pago dunha multa de 2,400 euros; a outro lle impón un ano e medio de prisión e multa de 1.800 euros; e ao terceiro procesado, 3 meses de prisión e multa de 600 euros. Todos deberán indemnizar ao Banco Pastor (agora Banco de Santander) en 743.588 euros.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.