Sergas e sindicatos pactan reunirse o 20 de febreiro para revisar as condicións dos médicos de urxencia
Tratarán, entre outros temas, aspectos como un estudo de necesidades nas urxencias, o réxime de descanso, o cómputo da xornada e doutras actividades que non sexan puramente asistenciais.
Por Europa Press / Redacción | SANTIAGO DE COMPOSTELA | 30/01/2024 | Actualizada ás 18:21
O Servizo Galego de Saúde (Sergas) e os sindicatos representados na mesa sectorial (CIG, CSIF, CCOO e UGT) pactaron que o próximo 20 de febreiro, o martes seguinte ás eleccións autonómicas, reunirase a comisión de seguimento do acordo asinado en 2007 coas condicións laborais dos médicos de urxencias. Esta era unha reivindicación que as organizacións de traballadores levaban xa anos pondo encima da mesa e que, precisamente, este luns motivou protestas ante as portas de urxencias dos hospitais galegos. O conselleiro de Sanidade, Julio García Comesaña, nas súas últimas declaracións públicas, mostrouse favorable a revisar esta cuestión.
De tal forma, nunha reunión da mesa sectorial celebrada este martes de varias horas de duración, administración e sindicatos acordaron volver verse nesa comisión de seguimento para tratar aspectos como un estudo de necesidades nas urxencias, o réxime de descanso, o cómputo da xornada e doutras actividades que non sexan puramente asistenciais. Ademais, o mesmo día 20 haberá tamén unha reunión da mesa sectorial para ratificar, de ser o caso, os acordos que se adopten nesta comisión de seguimento do pacto de 2007.
UNHA REIVINDICACIÓN DE HAI "TEMPO"
Por parte dos sindicatos, o secretario nacional de CIG-Saúde, Manuel G. Moreira, lembra que xa levaban "tempo" reclamando esta comisión de seguimento e, aínda que ve con bos ollos a apertura do diálogo, matiza que "satisfacción será cando cheguen a un acordo" asinado.
Tamén destaca o responsable do principal sindicato no Sergas que a negociación real se vaia a abrir unha vez coñecido o resultado dos comicios do 18 de febreiro, cando se poida albiscar como vai ser o próximo Goberno galego, ao ser "difícil" que se poidan implantar novas medidas en época preelectoral e co Parlamento disolto.
En termos similares pronúnciase Carlos Castro (CSIF-Sanidade), quen valora a apertura desta comisión, aínda que "xa podía ser antes". "Levabámolo tempo pedindo", subliña.
Por parte de CCOO, Javier González móstrase optimista: "O diálogo ábrese o día 20 e, unha vez ábrese, sempre se van a conseguir cousas. Igual non o 100%, pero vaise a avanzar, seguro". Ademais, González destaca que se poderá concretar a aplicación do acordo de abril de 2023 ao persoal de urxencias.
