A Xunta convoca axudas de 2,5 millóns para producir novas películas e series

O Diario Oficial de Galicia (DOG) publicou este luns as bases da convocatoria de subvencións a proxectos de produción e coprodución audiovisual de 2024, para a que a Xunta concede 2,5 millóns de euros

Segundo explican nun comunicado, estas axudas da Consellería de Cultura, Educación, FP e Universidades, son xestionadas a través da Axencia Galega das Industrias Culturais e "contribúen a alcanzar produtos de calidade con proxección interior e exterior".

As bases das subvencións a producións e coproducións audiovisuais diríxense especificamente a produtoras audiovisuais independentes para catro categorías e 13 submodalidades de proxectos segundo se os traballos son longametraxes cinematográficas de ficción, documentais ou de animación; longas en coprodución internacional con participación minoritaria española, curtametraxes ou películas e series para ser emitidas por televisión ou plataformas.

Poden optar a este financiamento todas aquelas empresas que acrediten un ano de antigüidade sen interrupcións na actividade, "dándolles cabida tanto a propostas máis ambiciosas respecto do seu deseño de produción e orzamento como a outras de menos envergadura, pero de gran interese artístico e cultural".

Lois Patiño, durante a rodaxe de Lúa Vermella.. TON ARIAS