A RAG e PuntoGal convocan o seu concurso de microrrelatos que premiará nove historias

A Real Academia Galega (RAG) e PuntoGal convocaron a sétima edición do seu concurso de microrrelatos. O certame repartirá nove premios ás mellores historias dun máximo de 200 palabras, tres por cada unha das categorías: infantil, xuvenil e adultos.

Os relatos poderán presentarse entre o 1 e o 29 de febreiro a través da páxina web relatos.gal. Así o comunicaron, este mércores na Fundación Luís Seoane da Coruña, o presidente da RAG, Víctor F. Freixanes; o director xeral de PuntoGal, Darío Janeiro; e o coordinador de Luzes, Lois Alcaide, revista que colabora no certame.

"É xa unha iniciativa consolidada que está a permitir visibilizar novas voces das nosas letras e que anima a moitas outras a aproveitar, desde a infancia, todo o potencial de expresión e enriquecemento persoal que ten a escritura", destacou Freixanes, durante a presentación. Na mesma liña, Janeiro, explicou que este concurso é "como un espello no que se reflicten as preocupacións tanto das persoas adultas como dos escritores e escritoras máis novas".

O certame repartirá premios tecnolóxicos e relacionados coa lectura, segundo explicaron os organizadores. Parte dos galardóns inclúen, ademais, un dominio .gal durante un ano e todas as persoas gañadoras verán publicadas as súas historias na Rede, así como editadas na versión impresa de Luzes xunto ás finalistas.  "A revista volve reafirmar, deste xeito, o seu compromiso como medio de comunicación coa expresión e a escritura en lingua galega", indicou Alcayde.