Case 12.000 cidadáns da UE residentes en Galicia teñen ata fin de mes para anotarse no censo das europeas
Un total de 6.983 xa están rexistrados e poderán exercer o seu dereito a voto desde a Comunidade galega.
Por Europa Press / Redacción | SANTIAGO DE COMPOSTELA | 21/01/2024 | Actualizada ás 12:50
Case 12.000 cidadáns da Unión Europea que residen en Galicia pero non son españois teñen ata o próximo 30 de xaneiro para anotarse no censo das eleccións europeas que se celebrarán o próximo 9 de xuño.
Para esta cita coas urnas xa están rexistrados para exercer o seu dereito ao voto un total de 6.983 persoas de países da Unión Europea que viven no catro provincias galegas e que xa manifestaron noutros comicios a súa vontade de votar desde España.
Co obxectivo de facilitar o trámite para aqueles que aínda non o fixeron, a Oficina do Censo Electoral enviará unha comunicación aos 11.913 cidadáns da UE que, segundo as cifras do Instituto Nacional de Estatística (INE), residen en Galicia pero non están rexistrados .
A maior parte deles viven nas provincias de Pontevedra (4.511) e A Coruña (3.981), mentres que en Ourense hai 1.928 e en Lugo, 1.493. A repartición por provincias de cidadáns europeos que poderán votar ao estar xa apuntados tamén o encabeza Pontevedra (2.462), aínda que hai máis en Ourense (2.147) que na Coruña (1.533) e que en Lugo (841).
PROCESO DE REXISTRO
Así, os europeos residentes en Galicia que non manifestasen antes a súa intención de votar nas europeas de primavera poderán facelo a través de dúas vías. Por unha banda, teñen a opción de realizar este trámite por vía telemática a través da sede electrónica do INE sempre que dispoñan de 'Cl@ve'.
En formato presencial, deben recorrer aos concellos onde están empadroados para obter o impreso elaborado pola Oficina do Censo Electoral (OCE). Este documento tamén está disponsible na sede electrónica do INE, de onde pode descargarse para, unha vez cuberto, ser entregado en sede municipal.
En aras de facilitar este proceso, a oficina do censo incluirá na súa comunicación ás persoas que non están rexistradas unha clave electrónica para que poidan facelo por vía telemática sen necesidade de contar co sistema 'Cl@ve'.
Así mesmo, tamén recibirán unha declaración formal que poderán completar, asinar e remitir á delegación provincial correspondente. Pola súa banda, os cidadáns que residen en España pero non están inscritos no padrón municipal deberán facelo para poder realizar o trámite de inscrición e exercer o seu dereito a voto nas eleccións europeas.
