Por E.P. | SANTIAGO DE COMPOSTELA | 17/01/2024 | Actualizada ás 11:26
Unións Agrarias e a Asociación Galega de Empresarios de Gando (Agega) instan á Xunta de Galicia a habilitar "orzamento suficiente" para compensar a subida de custos de produción en todo o sector produtor de vacún de carne.
Nun comunicado, ambas as organizacións celebran que a Consellería de Medio Rural habilitase fondos "para apoiar as producións amparadas na Indicación Xeográfica Protexida e, máis concretamente, a Tenreira Galega Suprema".
No entanto, lamentan os criterios escollidos "que deixan fóra non só ás explotacións que traballan á marxe da Indicación Xeográfica Protexida senón tamén ao 35% dos becerros criados dentro dela".
Ambas as organizacións fan un chamamento para que a administración galega "corrixa" o que ven como unha "discriminación" e que se faga en base á liña de axudas recentemente concedida aos produtores de Tenreira Galega. "E estenda ese apoio á totalidade do sector produtor de vacún de carne en Galicia".
Aínda que ambas as organizacións celebran a concesión de apoios, móstranse en desacordo cuns criterios de repartición que consideran "inxustos e discriminatorios", así como coa súa contía, "insuficiente para cubrir as necesidades dle sector".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.