18F.- Rueda destaca a lista do PP de Ourense como "exemplo" de "estabilidade" tras a etapa Baltar
Por E.P. | SANTIAGO DE COMPOSTELA | 15/01/2024 | Actualizada ás 21:15
O presidente do PPdeG e candidato á Presidencia da Xunta, Alfonso Rueda, destacou que a candidatura do PP de Ourense ás eleccións galegas do próximo 18 de febreiro é un exemplo de que é posible renovar desde a tranquilidade e mantendo a estabilidade, un modelo que fai extrapolable ao conxunto de Galicia.
Ante a xunta xestora provincial do partido, e conforme informou o PPdeG nun comunicado, o líder dos populares galegos transmitiu a súa intención de achegar, precisamente, tranquilidade e estabilidade a todos os galegos e galegas e, así, "illar" a Galicia de toda a "confrontación estéril" que se instalou na política nacional e que, segundo advirte, o "multipartito da oposición pretende estender a Galicia".
Pola súa banda, o presidente da xestora provincial, Luis Menor, remarcou os alicerces nos que se basea a candidatura ourensá presentada este luns para as eleccións galegas: a renovación, con 12 novas incorporacións dun total de 19 persoas; a representación territorial, coa práctica totalidade das comarcas da provincia presentes na lista; e a presenza de persoas que ata agora xogaron un papel importante no ámbito autonómico.
"Hai moitas persoas máis que tamén poderían participar nunha candidatura", dixo o líder dos populares de Ourense, que sostivo que "cada proceso electoral ten que estratexia e nomes máis idóneos". Segundo engadiu, os candidatos "xa saben que teñen que dar todo de si", pedindo tamén ao resto de cargos e afiliados "todo o apoio aos membros da lista para que poidan transmitir a proposta do goberno de Alfonso Rueda e lograr a súa primeira maioría absoluta".
