18F.- Ciudadanos non se presentará ás eleccións galegas

O Comité Nacional de Ciudadanos ratificou este luns a decisión de non concorrer ás próximas eleccións autonómicas en Galicia, que terán lugar o 18 de febreiro. Nun comunicado remitido aos medios, a formación sinala que "é o momento de administrar estratexicamente os esforzos, pensando e antepondo por encima de todo o interese de Galicia, do conxunto de España e de todos os españois".

A formación laranxa explica que o Comité Nacional de Ciudadanos valorou a proposta elevada de forma conxunta polo Comité Autonómico de Ciudadanos Galicia e a Dirección nacional en relación á convocatoria de eleccións ao Parlamento galego o próximo 18 de febreiro. Na cita, o Comité Nacional ratificou a decisión de non concorrer ás mencionadas eleccións, "tendo en conta as circunstancias nas que se celebran". Ademais, asegura compartir "plenamente esta responsable decisión".

Ademais, Ciudadanos sitúa "as futuras eleccións europeas e as que terán lugar ao Parlament de Cataluña" como "o inicio da recuperación" do seu espazo político. "Un escenario onde os liberais debemos achegar o mellor de nós para defender o Estado de dereito e as liberdades fronte á ameaza que supón a deriva do Goberno de Sánchez e os seus socios", sinala a formación.

Ciudadanos agradeceu aos seus militantes e simpatizantes "a súa xenerosidade, altura de miras e compromiso", "así como o traballo realizado nestes meses en Galicia e no conxunto de España" para levar a cabo unha reestruturación que "será fundamental no futuro inmediato". "A decisión, que nos afasta momentaneamente da contenda electoral nesta comunidade, está tomada precisamente coa firme convicción de volver nun futuro próximo a estar presentes nas citas coas urnas, e representar e defender os intereses de todos os liberais españois e do conxunto de compatriotas que cren na súa nación e na súa democracia", finaliza Ciudadanos.

Sede central de Ciudadanos Galicia | Fonte: Cs - Arquivo