A serie infantil 'Os Argonautas e a moeda de ouro', rodada en Galicia, estréase en galego na CRTVG
Estará dispoñible na nova plataforma dixital da corporación
Por E.P. | SANTIAGO DE COMPOSTELA | 12/01/2024 | Actualizada ás 17:42
A serie infantil 'Os Argonautas e a moeda de ouro', rodada en Galicia por Portocabo co apoio da Xunta, estrea a súa versión galega na CRTVG. Destinada a nenos de 8 a 12 anos, emitirase na nova plataforma dixital dos medios públicos, que entrará en funcionamento este mes de xaneiro.
A CRTVG presentou este venres en Santiago de Compostela esta ficción de aventuras nun acto celebrado no auditorio Abanca e ao que asistiu o conselleiro de Cultura, Educación, FP e Universidades, Román Rodríguez.
Alí, tal e como informou o ente público nun comunicado, escolares de primaria e secundaria puideron gozar do primeiro episodio da serie nunha proxección na capital galega, na que coñeceron ao cinco amigos protagonistas Alba, Lucas, Sali, Olivia e Nil, que viven un emocionante verán nun pobo mariñeiro (Laxe, A Coruña), onde se enfrontan a perigos e descobren o valor da amizade.
Dirixida por Toño López e Lucía Estévez, 'Os argonautas e a moeda de ouro' é unha ficción integradora, con nenos de realidades diversas. O elenco está composto, entre outros, por Eva Fernández, Xosé Antonio Touriñán, Víctor Mosqueira, Denis Gómez, César Cambeiro, Federico Pérez e os nenos Aliyah Fidalgo, Sarela Montes, Brais Sixto, Claudia Pujaldes, Juan Rodríguez, Lúa Varela e Xoel Río.
A TVG participa nesta ficción coproducida por RTVE e a produtora galega Portocabo, e que conta, ademais, con 350.000 euros de apoio do Hub Audiovisual da Xunta de Galicia financiado polo Fondo Europeo de Desarollo Rexional (FEDER) dentro do Eixo REACT-UE.
O acto, conforme sinalou a Xunta noutro comunicado, o conselleiro puxo en valor a oportunidade de poder gozar da serie en galego na nova plataforma da TVG e poder apreciar o talento de todo a repartición e do equipo técnico de Portocabo, á que se referiu como "un novo fito a cargo dunha produtora que continúa facendo historia do audiovisual en Galicia".
