Por E.P. | SANTIAGO DE COMPOSTELA | 09/01/2024 | Actualizada ás 21:12
O candidato do PSdeG á Presidencia da Xunta, José Ramón Gómez Besteiro, apelou aos seus a "mobilizarse coma se non houbese un mañá" para lograr o cambio en Galicia. "Non podemos perder nin un minuto. Debemos trasladar que o cambio é posible", afirmou.
O dirixente socialista chamou á mobilización no que é o seu primeiro discurso ante o Comité Nacional do PSdeG, máximo órgano de reunión entre congresos, desde a súa elección como candidato á Xunta nas primarias celebradas pola formación. Na cita, aprobáronse por aclamación as listas coas que o partido concorrerá ás eleccións do 18 de febreiro.
Na súa intervención, avisou ao partido de que se son quen de mobilizar todo o "caudal progresista" que "hai pouco" acudiu ás urnas, será posible o cambio en Galicia. "Pídovos un esforzo máximo, porque será bo para todos", afirmou nun discurso no que sostivo que Galicia "non se pode permitir catro anos máis do PP".
Ademais, mostrouse convencido de que só un PSdeG "forte" e "altamente referendado nas urnas" é o "único capaz de que en Galicia se produza ese cambio tan necesario que os galegos queren e desexan". O político lucense erixiu ao PSOE no "adversario incómodo" do Partido Popular pola súa capacidade de mobilizar a ese 50% do electorado que "a día de hoxe aínda non sabe o que vai votar".
"CANDIDATURA GAÑADORA"
Na súa intervención, Besteiro apelou este martes ao "galeguismo útil" para concentrar o voto na "candidatura gañadora" que presenta o PSdeG.
Deste xeito, defendeu a candidatura composta por "mulleres e homes á altura de representar" aos galegos como se merecen, e que conforman "un equipo que se envorcará en construír o mellor futuro para Galicia".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.