Publicadas as datas das probas de acceso a ciclos en Galicia: 18 de abril para superiores e 23 de maio para medios
A Xunta fai pública a orde cos prazos destes exames, cuxas notas valerán en todo o territorio estatal e terán 2 anos de validez.
Por Europa Press / Redacción | Compostela | 08/01/2024 | Actualizada ás 12:43
A Consellería de Cultura, Educación, Formación Profesional e Universidades publicou este luns a orde coas probas de acceso aos ciclos formativos para este curso en Galicia. Así, os exames xa teñen data: o 18 de abril serán as de grao superior e o 23 de maio, as de medio.
Por unha banda, as probas de acceso a ciclos superiores permiten entrar a persoas a partir de 19 anos que non posúan o título de Bacharelato, nin o de técnico de FP, nin outros equivalentes. Estarán exentos os aspirantes que superasen a proba de acceso á universidade para maiores de 25.
As solicitudes de inscrición, que se poderá realizar tanto pola sede electrónica da Xunta como ante a secretaría de calquera centro público, faranse desde o 29 de xaneiro e ata o 9 de febreiro. Posteriormente, o 19 de febreiro, publicarase a listaxe provisional de admitidos e excluídos, e o 11 de abril coñecerase a definitiva.
Os exames para entrar nun ciclo superior celebraranse o 18 de abril a partir das 9,00 horas e estenderanse ata a tarde. Constarán dunha parte común con Lingua Galega, Lingua Castelá e Matemáticas, máis unha específica con tres opcións en función do ciclo que se queira acceder: unha primeira con Economía de Empresa, Lingua Estranxeira e Filosofía; a segunda con Debuxo Técnico, Tecnoloxía Industrial e Física; e a terceira con Ciencias da Terra e Ambientais, Química e Bioloxía. As notas provisionais publicaranse o 29 de abril e, tras un período de reclamacións ata o 6 de maio, as definitivas coñeceranse o 31 dese mes.
CICLOS DE GRAO MEDIO
No que respecta ás probas de acceso a ciclos de grao medio, que serán o 18 de abril, están destinadas a persoas de 17 anos en diante que non teñan o título de Educación Secundaria Obrigatoria (ESO), nin un título profesional básico, nin outros estudos equivalentes.
Poderán estar exentas as persoas que superasen a proba de acceso á universidade para maiores de 25 anos, así como as que aprobasen as probas de acceso a grao superior e as do grao medio de ensinos deportivos ou de artes plásticas e deseño.
