Por Europa Press / Redacción | SANTIAGO DE COMPOSTELA | 06/01/2024 | Actualizada ás 19:00
As vivendas de uso turístico en Galicia continúan en alza --supoñen o 83% dos establecementos turísticos da comunidade--, a pesar das novas regulacións e entre críticas do sector que sente "culpabilizado" por un problema de vivenda "que vai moito máis alá".
Segundo o Rexistro de empresas e actividades turísticas da Xunta de Galicia, con datos solicitados ata o 1 de decembro do pasado ano, en Galicia hai 21.702 vivendas de uso turístico, cun total de 115.410 prazas. As sete grandes cidades suman 4.566 establecementos, concentrando a cidade de Vigo 1.560. A continuación sitúase A Coruña, con 1.123 VUTs, e xa por baixo do milleiro, Santiago, con 807; Pontevedra, con 454; Ourense, con 365; e Lugo, con 257.
Así, segundo os datos do rexistro, o sete cidades suman máis VUTs que o resto de establecementos hoteleiros presentes en Galicia que, entre albergues, apartamentos, cámpings, hoteis, pensións, turismo rural e outras, suman 4.182. Máis aló dos grandes núcleos, a maior concentración de VUTs, sobre todo se se ten en conta a súa poboación, atópase na costa de Pontevedra, con 4.039 establecementos na zona.
Concretamente, o concello de Sanxenxo --un dos máis turísticos de Galicia--, notifica 2.753 vivendas de uso turístico, o que supón unha concentración do 12,68% de todas as VUTs galegas. Este municipio pontevedrés, segundo os últimos datos do INE, ten 17.760 habitantes, o 0,65% de toda a poboación da comunidade (2,7 millóns).
A distancia, séguenlle O Grove, con 650 vivendas; Vilagarcía de Arousa, con 406; e Cambados, con 230.
CLÚSTER PIDE ACTUALIZAR UNHA REGULACIÓN "OBSOLETA"
O presidente do Clúster de Turismo, Cesáreo Pardal, avogou por unha nova regulación deste tipo de vivendas, dado que a vixente é de 2017 e está "obsoleta". "Hai que adaptala á actividade empresarial", resume.
"Existe un limbo xurídico ao que se sumou moita xente para facer negocio", lamenta. Nesta liña, fai referencia a datos que manexa o Clúster e que indican que 11 propietarios posúen 2.500 VUTs. "Iso é funcionar como unha empresa", insiste.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.