Caen os prezos industriais un 7,2% en novembro
Por E.P. | A CORUÑA | 26/12/2023 | Actualizada ás 11:16
Os prezos industriais rexistraron en novembro en Galicia unha caída do 7,2% en relación ao mesmo mes do ano anterior, por encima da de outubro, que se situou no 6,7% e por baixo da media estatal, que foi do 7,4%, segundo informou este martes o Instituto Nacional de Estatística (INE).
No caso dos bens de consumo, houbo un aumento do 5,6 por cento, en concreto nos de consumo duradeiro foi do 1,1 e o non duradeiro do 5,7. Nos bens de equipo, houbo un incremento do 1,6%, mentres que os bens intermedios rexistraron unha caída do 4 por cento, á que se sumou a da enerxía que foi do 23,2 por cento.
En España, co descenso interanual de novembro, a inflación do sector industrial encadea nove meses de taxas negativas despois de que en marzo puxese fin a un período de 26 meses consecutivos de incrementos, no que chegou a rexistrar taxas positivas de dous díxitos durante máis de 20 meses.
A evolución dos prezos industriais en novembro débese ao aumento experimentado pola enerxía, que elevou máis de catro décimas a súa taxa, ata o -23%, debido a que a baixada dos prezos da produción de gas e distribución por tubaxe de combustibles gaseosos é menor que a de novembro de 2022.
Na moderación da taxa de inflación industrial de novembro tamén influíron os bens de consumo non duradeiro, cuxa taxa diminuíu case 1 punto, ata o 7,5%, pola estabilidade dos prezos da fabricación de produtos lácteos, fronte á subida de novembro do ano anterior e, en menor medida, da subida dos prezos da fabricación de aceites e graxas vexetais e animais, menor que a de 2022.
