CIG e ASCA convocan folga en Abanca para o 11 de xaneiro por unha "brutal" perda de poder adquisitivo

Os sindicatos CIG e ASCA convocan folga en Abanca para o 11 de xaneiro co fin de reclamar medidas coas que compensar a "brutal" perda de poder adquisitivo desde 2010, así como a apertura dunha negociación para reducir os horarios laborais.

Nun comunicado, a CIG informa de que ese 11 de xaneiro tamén celebrarán unha manifestación na cidade da Coruña, que sairá ás 11,00 horas do Obelisco.

Apunta que se trata a primeira folga no sector que se convoca para "esixir que os beneficios multimillonarios non sexan a custo de manter os duros recortes que a entidade impuxo ao persoal durante os anos de crise financeira". Censura que Abanca "tivo uns beneficios en setembro de 429 millóns de euros, triplicando os do ano anterior, pero que pretende manter indefinidamente as condicións laborais implantadas a través dos sucesivos ERE xustificados pola crise financeira".

Expón que os salarios do convenio de CECA, que agrupa aos bancos nados das antigas caixas, entre eles Abanca, incrementáronse un 5,1% desde 2010, un período no que o IPC subiu un 27,1%. Engade que desde a fusión "recortáronse salarios", "hoxe os máis baixos do sector financeiro", á vez que se ampliaron horarios. "O persoal traballa máis tardes e durante máis meses que no resto de entidades", agrega.

Xunto a isto, denuncia "destrución" de emprego, cun aumento da temporalidade "a través da utilización de contratos en prácticas para a cobertura de postos estruturais" ou contratos a tempo parcial. "Isto provocou unha precarización do emprego e as condicións laborais dese persoal, moitas veces desprazado as oficinas fose do lugar de residencia".

Ademais, a CIG denuncia un "clima laboral tóxico derivado dunha política comercial tremendamente agresiva", á vez que pide reverter os recortes en materia de seguridade despois dos atracos a sucursais de Vigo e Ourense.

Oficina de Abanca | Fonte: Abanca.