Por E.P. | SANTIAGO DE COMPOSTELA | 19/12/2023 | Actualizada ás 18:56
O comité de empresa de Navantia Ferrol critica as "visitas fugaces" de membros do Goberno central e do PSOE ao longo da pasada semana e esixen ao presidente, Pedro Sánchez, quen precisamente asistiu o sábado ao corte de chapa da fragata F-112, que teña "compromisos" concretos co estaleiro da empresa pública e coa comarca.
Así se pronuncia a representación dos traballadores nun comunicado despois dunha semana na que acudiu non só Sánchez, senón tamén o secretario xeral do PSdeG-PSOE, Valentín González Formoso, e o candidato socialista á Xunta, José Ramón Gómez Besteiro, o luns; e a ministra de Defensa, Margarita Robles, o xoves.
En primeiro lugar, o comité mantivo con Formoso e Besteiro un encontro do que "pouco esperaban e pouco obtiveron", só "palabras bonitas e anuncios que se enloban no contexto de precampaña electoral". Así, esixiron ao candidato do PSdeG unha "aposta clara e diáfana" ás súas reivindicacións.
Despois da visita da ministra o xoves, o sábado Pedro Sánchez acudiu ao corte de chapa da F-112 e á posta da primeira pedra da fábrica dixital de bloques. Segundo informa o comité, lograron manter unha "reunión fugaz de pouco máis de cinco minutos" co presidente para trasladarlle as súas reivindicacións.
En resumo, reclamáronlle un "compromiso" para fabricar dúas fragatas máis da serie F-110 e que poña "todo da súa man" para alcanzar o contrato con Australia. Tamén lle pediron que debullase o anuncio realizado en marzo con 1.500 empregos para Navantia que comprometeu Sánchez noutro acto en Cataluña.
"A todas estas formulacións non obtivemos máis compromisos que dicir que están a traballar niso", lamenta o comité, que critica que a semana finalizase con varias visitas fugaces de autoridades que "lonxe de comprometerse con esta comarca, só foron capaces de anunciar obras e proxectos que deberían facerse fai catro anos".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.