O exsocialista Juan Díaz Villoslada abandona o PSOE por falta de "ética" e incorpórase a Sumar Galicia

O exmilitante socialista Juan Díaz Villoslada incorporouse en Galicia ao proxecto liderado por Yolanda Díaz, Sumar, tras pedir a baixa do Partido Socialista, formación coa que foi deputado na Cámara galega e concelleiro no Concello da Coruña. En declaracións a Europa Press, Villoslada, que tamén competiu en 2017 por facerse coa Secretaría Xeral do PSdeG nas primarias que acabaría gañando Gonzalo Caballero, explicou que deu este paso tras levar tempo "madurando a decisión" de darse de baixa da militancia do PSOE.

E é que, conforme el mesmo sinalou nunha carta remitida á Agrupación da Coruña, decidiu abandonar as filas socialistas por botar en falta principios como a "ética", a "coherencia" e o "servizo público" tanto na dirección local do PSOE da Coruña como na dirección galega. "Levaba tempo madurando a decisión de darme de baixa da militancia do PSOE en Galicia e, neses momentos, xorde unha chamada de Sumar para ver se me incorporo á participación no grupo promotor", explicou Villosalda.

O que fora parlamentario autonómico do PSdeG recoñeceu que a súa decisión "non se podía demorar" á vista dos calendarios electorais, nun contexto en que Galicia se especula cun posible adianto electoral que situaría as eleccións autonómicas no primeiro trimestre do ano. Así as cousas, sinalou que tomou a decisión de incorporarse a Sumar ao considerar que se trata dun proxecto que axunta "sensibilidades progresistas plurais" para abordar un "proxecto de transformación e de cambio progresista en Galicia".

Villoslada, que detallou que o acordo para a súa incorporación selouse a última hora da tarde do martes, subliñou que formará parte deste grupo promotor que se presentará nos próximos días, coa presentación na que participará Yolanda Díaz na Coruña. O obxectivo, indicou, é converter a Sumar Galicia nun "proxecto de longo percorrido". Así, sinala que aínda que os calendarios das autonómicas e as eleccións europeas marcarán os tempos, subliña que iso será "a curto prazo". "Sumar Galicia ten que ser un proxecto de longo percorrido, de goberno a dez anos para tratar de reconstruír un espazo progresita amplo", dixo.

O deputado Juan Díaz Villoslada | Fonte: Europa Press - Arquivo