A Xunta oferta 901 prazas no concurso de traslados para persoal de prevención de incendios e axentes forestais

A Xunta de Galicia oferta 901 prazas no concurso de traslados destinado ao persoal de prevención de incendios e axentes forestais e ambientais.

O Diario Oficial de Galicia (DOG) publicou este martes concursos comúns para a provisión de postos de traballo vacantes da Administración especial correspondentes ás escalas técnica e auxiliar vinculadas ao servizo de prevención e defensa contra incendios forestais, e da escala de axentes forestais e axentes facultativos ambientais da Xunta.

En concreto, segundo detallou a Consellería de Facenda e Administración Pública, ofértanse 780 prazas no ámbito do servizo de prevención de incendios e outras 121 prazas no concurso de axentes forestais e axentes facultativos ambientais. Os últimos concursos de traslados destas escalas, destacou, convocáronse nos anos 2009, 2011 e 2012.

A través deste proceso, a Administración cobre os postos de traballo vacantes e o persoal funcionario pode cambiar voluntariamente do seu posto de traballo a outro que se adapte mellor ás súas preferencias.

Axentes das Brigadas de Reforzo en Incendios Forestais (BRIF) realizan labores de extinción nas inmediacións dun incendio en Samos | Fonte: Carlos Castro