Ana Pontón ve "falta de vontade política" para unha "alternativa de futuro" nas Pontes
Pontón participou no mediodía deste xoves na manifestación que percorreu varias rúas das Pontes coincidindo coa xornada de folga xeral convocada neste municipio en solitario polo sindicato CIG.
Por Europa Press / Redacción | SANTIAGO DE COMPOSTELA | 23/11/2023 | Actualizada ás 17:31
A portavoz nacional de BNG, Ana Pontón, reclamou aos gobernos de Xunta e Estado que se aplique "unha transición xusta para As Pontes", xa que ao seu entender "hai alternativas económicas para unha localidade que se está xogando o seu futuro laboral e o seu futuro social", á vez que criticou a "falta de vontade política" para alcanzar "unha alternativa de futuro" para esta localidade.
"Para que haxa futuro ten que haber unha transición enerxética xusta, e non unha fraude, porque tanto o Goberno central como o Goberno da Xunta non están a actuar para defender isto", dixo.
Pontón participou no mediodía deste xoves na manifestación que percorreu varias rúas das Pontes coincidindo coa xornada de folga xeral convocada neste municipio en solitario polo sindicato CIG.
"Vemos como hai unha falta de vontade política para que o peche da central signifique que haxa unha alternativa de futuro, porque de momento o único que temos son promesas incumpridas e unha falta de compromiso con esta localidade", trasladou a nacionalista, que ve esta situación "inconcibible".
PROMESAS
A portavoz nacional do BNG destacou que "ao longo destes últimos anos" fixéronse "moitos anuncios" que "non se están materializando en compromisos concretos". O peche da central térmica propiedade de Endesa "xa fai catro anos que se anunciou", lembrou, "pero a estas alturas non hai un plan de industrialización para As Pontes".
Nese sentido, desde o BNG denunciaron que "hai un trato moi distinto respecto de como se está actuando noutras partes, como en Aragón, onde si hai un concurso de transición enerxética xusta desde o ano 2022", mentres que nas Pontes "non se sabe nada respecto do futuro, máis aló de anuncios en prensa", polo que non hai "a certeza de que se vaia a levar adiante".
Por último, Pontón pediu que se poña en marcha un concurso "para unha transición enerxética xusta con adxudicación de todos os megawatts que van quedar libres en relación co peche da central térmica", concretamente 1.400 MW. "Para nós isto é clave, porque ese concurso significa que vaia a haber proxectos que teñan que competir, con transparencia e criterios sociais á hora de adxudicar eses megawatts".
