Nove Lúas, de Lionel Rexes Martínez, gaña o premio Xosé Neira Vilas de Novela Curta
O xurado da oitava edición sinala da obra: "Sobre o pano de fondo da guerra civil, destaca a vontade de estilo".
Por Europa Press / Redacción | SANTIAGO DE COMPOSTELA | 31/10/2023 | Actualizada ás 12:19
O xurado da oitava edición do Premio Xosé Neira Vilas de Novela Curta outorgou este luns pola tarde, por unanimidade, o galardón á obra Nove Lúas, de Lionel Rexes Martínez. A sesión, sinalan nun comunicado, celebrouse no Pazo de San Roque e o xurado estivo integrado polos membros da Fundación Xosé Neira Vilas, Juan Andrés Fernández e Rosalía Morlán, así como polo crítico literario e profesor universitario, Armando Requeixo.
O xurado destacou a estrutura narrativa armada ao redor das relacións dos personaxes e de como deben afrontar as opcións vitais e laborais en contextos de gran dificultade. "Sobre o pano de fondo da guerra civil, destaca a vontade de estilo que impregna todo o relato", sinalan. O premio está dotado con 1.000 euros e a publicación do traballo seleccionado en Edicións Embora. Segundo apuntan, o obxectivo do certame, dirixido ao público infantil e xuvenil, é estimar a creación literaria, fomentar a lectura en lingua galega e proporcionar obras de calidade ao público novo que lle permitan achegarse ao mundo da novela.
