Os catro presidentes das deputacións comparecerán na Cámara galega o vindeiro venres para debullar os orzamentos

Os catro presidentes das deputacións provinciais galegas presentarán o vindeiro venres, día 3 de novembro, as contas das súas administracións no Parlamento de Galicia, tal e como confirmaron fontes das distintas institucións. Será a primeira vez en máis dun lustro que os catro presidentes comparezan na comisión de Orzamentos tendo en conta que a expresidenta socialista da Deputación de Pontevedra, Carmela Silva, ausentouse do Pazo do Hórreo desde 2017 alegando que estaba amparada polo principio de autonómia local.

Así, tal e como confirmaron fontes de deputacións da Coruña e Lugo, os dous presidentes socialistas, Valentín González Formoso e José Tomé, si estarán presentes na comisión de Orzamentos como xa fixeron nos últimos anos. Ademais, a deste ano será a primeira vez que os populares que presiden as deputacións de Ourense, Luís Menor, e Pontevedra, Luís López, acudan á Cámara galega a debullar as contas das institucións que dirixen tras tomar a substitución tanto de Manuel Baltar como de Carmela Silva, respectivamente.

Fachada principal do Pazo do Hórreo, sede do Parlamento de Galicia | Fonte: Parlamento de Galicia - Arquivo