Un policía local de Vilagarcía salva a vida a un veciño con manobras de reanimación
Por Europa Press / Redacción | PONTEVEDRA | 19/10/2023 | Actualizada ás 16:32
A rápida actuación e os coñecementos dun axente de Policía Local de Vilagarcía acerca da manobra de reanimación cardiopulmonar (RCP) permitiron salvar a vida a un veciño desta localidade, de 51 anos de idade, que se esborrallou na rúa.
Segundo informaron fontes municipais, os feitos ocorreron na tarde deste mércores, cando unha patrulla policial localizou a este home, tombado no chan na rúa Santa Eulalia. Os axentes comprobaron que o home estaba inconsciente, non respiraba, estaba pálido e non respondía os estímulos.
Un dos policías comezou rapidamente a practicar manobras de reanimación cardiopulmonar, ata a chegada dos profesionais sanitarios da ambulancia medicalizada, uns 12 minutos despois.
Os sanitarios monitoraron á vítima, para comprobar que as manobras de RCP surtiran grande efecto, xa que o home presentaba constantes vitais e "parecía estabilizado". A continuación, foi evacuado ao hospital Montecelo.
